Diahuebs anochi e directiva di Brazil Taekwondo Stichting a reuni na Centro di Bario Brazil. A discuti varios punto, specialmente e di 8 Aruba Caribbean Cargo Taekwondo Cup di Sra. Lila de Cuba cu ta biba na Miami y cu semper ta contribui cu Brazil Taekwondo Stichting y pa 8 aña consecutivo caba e ta sponsor di e Aruba Caribbean Cargo Taekwondo Cup cu ta dia 30 di September 2017.
A discuti tocante di e punto di mas importante cu ta e Cena di Pasco y con esaki lo bay wordo haci e aña aki, mirando cu tur aña ta haci esaki diferente pa no tur aña bin cu e mesun cos. Tin algun personahe cu ta bay bin for di exterior pa asina haci e Cena di Pasco aki un tiki diferente. Lo cuminsa cu e invitacion na luna di October caba pa asina por sigui cu tur e preparacionnan. Josefa Willems ta e tesorera di Brazil Taekwondo Stichting y a controla tur e recibonan di Korea y asina por termina e relato financiero di Korea. Aki si tabata tin un challenge, door cu tur e recibonan ta na Koreano.
E siguiente car wash y BBQ lo bay segun e plan di 2017 cu ta bay ta dia 1 di October. Ainda no por forma un team di TK5 infantil pa e TK5 na Corsou na luna di November y ta haci dificil pa Aruba por participa cu un team di infantil, pero si lo bay cu algun Junior cu lo bay forma hunto cu Corsou un team pa asina enfrenta e otro paisnan internacional.
Alberto Klabér a trece pa dilanti cu e lo participa na e President’s Cup cu ta un G2 na Las Vegas cu solamente 1 atleta, mirando e resultadonan cu a presenta na Costa Rica. Ainda lo por bin cambio, si e dos rumannan Lowe nan mayor keda cla cu nan paspoortnan.