Cu golnan di Neymar y Firmino, Brazil a mustra bon cla cu e ta e faborito y ta pasa pa semi- final di mundial Rusia 2018.
E seleccion Brazilero a impone su mes dialuna den e Samara Arena contra di e seleccion di Mexico 2-0.
E prome 45 minuutnan a duna comienso a mustra un Mexico den atake constante y bon para den medio campo. Segun e minuutnan ta core, Brazil a subi e tempo y a genera varios opcion cla cu a obliga e keeper Ochoa na demostra su habilidadnan. Mexico tabata tin problema pa sali di su zona y a wordo obliga di hala patras door di e constante atakenan di e Canarinha.
Den e di dos mita y na poco minuut di cu e wega a cuminsa, e Brazileronan a habri e score cu’n gol di Neymar despues di un centro di William. A pesar di tur intento di e Tri di empata e wega, e selección ‘ ‘verdeamarela’ a demostra su superioridad y a mantene e control di e bala.
E Mexicanonan a resisti na e poder contundente di Brazil na man di e keeper Ochoa, cu na varios ocasion a salba su seleccion y a evita un score mucho mas halto.
Na mas o menos 70′ un hugada un poco confuso unda cu Neymar ta wordo golpia na su pia banda drecha. E partido a wordo para pa un par di minuut door cu supuestamente Layun lo a trapa ariba e pia e nr. 10 di Brazil.
Na di 88′, Firmino, cu a caba di drenta tereno di wega, a sentencia e compromiso via un pase magistral di Neymar cu a concreta cu facilidad di duna Brazil e victoria di 2-0 ariba Mexico.