BELO HORIZONTE, Brasil – Cu un contundente goleada di 3-0, e seleccion di Brasil a profundisa e crisis cu ta asota Argentina den e eliminatorianan pa e Copa di Mundo di Rusia 2018, den e disputa di e di 11 fecha cu tambe a reporta otro palisa pa e bishitante Peru contra Paraguay di 1-4, e victoria di Uruguay contra Ecuador 2-1 y e empate 0-0 Colombia y Chile, como resultadonan mas destaca.
E ekipo dirigi pa Adenor Bacchi “Tite” a desnuda e erornan grave di un Argentina lidera pa Edgardo “Paton” Bauza, cu no ta coy rumbo nort y por cay pa mas gol den e partido hunga den e stadion Mineirao di Belo Horizonte.
E asina tanto Brasileñonan a bin pa e intermedio di Philippe Coutinho (m24), Neymar (m45) y Paulinho (m.58). Brasil ta yega asina na e 24 puntonan, mientras cu Argentina ta keda wanta den 16 unidad.
Un di e sorpresanan grandi di e hornada tabata e goleada di 1-4 di Peru riba Paraguay na Asuncion. E Guaraninan di Francisco Arce a bay dilanti cu tanto Cristian Riveros (m.9), pero e Peruanonan di Ricardo Gareca a bay fuertemente todo por todo y a caba cu e dianan di Christian Ramos (m.47), Edison Flores (m70), Christian Cueva (m.78) y un autogol di Edgar Benitez.
Peru a yega na 14 punto, mientras cu Paraguay a keda cu 15.
Uruguay, den su Montevideano stadion Centenario, a vence Ecuador 2-1, cu tantonan di Sebastian Coates (m.12) y Diego Rolan (m.45). E ecuatorianonan a empata transitoriamente atrabes di Felipe Caicedo (m.44).
E muchanan di Oscar Washington Tabares a yega na 23 punto, mientras cu esunnan di e Argentino Gustavo Quinteros a staciona cu 17.
Den e prome partido di e hornada, Colombia y Chile a empata 0-0 na Barranquilla, loke a laga e muchanan di Jose Pekerman cu 18 punto y esunnan di Juan Antonio Pizzi cu 17.
Venezuela a sacudi di e mal resultadonan cu un contundente goleada di 5-0 riba Bolivia na Maturin. Jacobo Koufatti (m.2), Josef Martinez (m.9, 66 y 69) y Romulo Otero (m.73) tabata e responsabelnan di e abultado fabor di e dirigidonan pa Rafael Dudamel. E vinotinto Venezolano a suma cinco punto y Bolivia a keda sin pasa di e cuater puntonan.
Den e hornada 12, disputando diamars proximo, Bolivia lo ricibi Paraguay na La Paz; Ecuador ta ricibi Venezuela na Quito; Chile ta ricibi Uruguay na Santiago; Argentina ta ricibi Colombia na San Juan y Peru lo ricibi Brasil na Lima.
Tabla di posicion di e eliminatorionan Sur Americano pa e Copa di Mundo Rusia 2018:
- Brasil – 24
- Uruguay – 23
- Colombia – 18
- Ecuador – 17
- Chile – 17
- Argentina – 16
- Paraguay – 15
- Perú – 14
- Venezuela – 5
- Bolivia – 4
Fuente: CNN en Español