Durante 8 dia Aruba ta disfrutando di un softball di un nivel technico hopi halto unda 6 pais ta batayando pa medaya den e di XIII campeonato femenino WBSC Suramericana /CONSURSA. Aruba Softball Bond hunto cu su Comision Organisador a efectua un trabou magnifico cu fondonan hopi limita pero ta contento di e reaccion di elogio cu nan ta ricibiendo di henter sur America. Riba plataforma internacional ta hunga e sistema di playoff cual nan ta yama page system playoff cual ta duna e number uno y number 2 un di dos oportunidad pa a sali den top. Asina number 3 ta hunga contra number 4 esta Venezuela vs Corsou y e ganado ta continua y e perdedo ta bay cas.
Venezuela a gana Corsou y a continua. Number 1 ( Argentina) ta topa number 2 ( Brasil) y e ganado ta pasa pa final garantisando minimo e medaya di Plata mientras e perdedo lo hunga e ganador di 3 vs 4 esta den e caso aki Venezuela. Den un tremendo wega Brasil ta gana Argentina y asina Brasil ta pasa pa final mientras Argentina lo enfrenta Venezuela pa mira kende lo topa Brasil bek den e gran final pa medaya di “ORO”. Brasil 5 careda, 13 hit, 2 eror y ta laga 10 coredo den circulacion. Argentina 3 careda, 7 hit, 0 error y ta laga 4 coredo na base. Miho batiadonan pa Brasil ta Mayra Akamine, Fernanda Shiroma y Beatrice Nakea tur a bay di 4-2, Alissa Yoshioka 1-1, Fernanda Missaki y Fernanda Narita di 3-1. Pa Argentina a destaca na plato Juliana Martinez di 3-2, Magali Frezzotti 2-1, Dolores Fernandez, Pamela Clark, Candela Sole y Melina Milliozzi tur a bay di 3-1. Fernanda Shiroma kende a drenta releva Diana Kikushi despues di 2 entrada y a lansa 5 inning, 19 bola, 50 strike pa un total di 69 lansamento propinando 2 ponche y ta permiti 2 careda limpi pa un ERA di 2.80 ta resulta pitcher ganado. Tamara Togni ta bay 5 inning y 2 tercio lansando 43 bola, 64 strike pa un total di 107 lansamento propinando 4 strike outs y ta regala 2 base por bola ta resulta pitcher perdedor. Tamara ta wordo releva pa Carina Amarilla kende ta tira 1 inning y 1 tercio. Cu e resultado aki Brasil ta pasa pa final garantisando medaya di Plata en busca di medaya di “ORO” mientras Argentina lo enfrenta Venezuela y e ganado ey lo hunga den e gran final. Weganan di un nivel hopi halto di softball. Campeonato Internacional un exito rotundo.