Diadomingo atardi Cuerpo di Bombero hunto cu Cliff Faldman tabata anfitrion di e conmemoracion di 15 aniversario di e atakenan terorista na New York City y Pentagon riba 9/11/2001 cu a reclama no menos di 2.996 bida inocente. Faldman, kende tabata un bombero boluntario na New York, actualmente ta biba na Aruba y ta traha como chiropractor.
Desde cu el a bin Aruba e tin un amistad grandi cu Cuerpo di Bombero di Aruba y a organisa diferente actividad, incluyendo e conmemoracion di e di 10 aniversario y awo esun di e 15 aniversario di e tragedia cu a conmove henter mundo. E ceremonia a tuma luga na e estatua di Anne Frank den Wilhelminapark.
Minister President mr. Mike Eman, Minister di Husticia mr. Drs. Arthur Dowers y Comandante di Cuerpo di Bombero y Rescate Nacional, Ing. Eduard de Cuba a hiba palabra despues di introduccion haci pa Cliff Faldman y un oracion comparti pa Rabbi Daniel Kipper. Representando Cuerpo Policial tabata Comisario Jeannette Richardson-Baars. A conta cu presencia di Servicio di Ambulance, kende a uni cu Cuerpo di Bombero pa recorda esunnan cu a fayece durante e tragedia y demostra nan apoyo na e sobrevivientenan y famia di esunnan envolvi di un of otro forma.
Comandante de Cuba a subraya e impacto di e tragedia riba rumannan den nan profesion di bombero na mundo y Aruba no tabata diferente. El a bisa cu ta un hecho cu na momento di e fecha 9/11 tur hende ta corda unda nan tabata y kico nan tabata haciendo na momento cu e notificacion y noticianan a cuminsa drenta. E mes ta corda cu pa un ora nan a sinta mira e tragedia desaroya, nan tabata den Kazerne na trabao y e telefonnan tabata keto keto pa un ora.
Despues di e ora, e telefonnan a cuminsa zona y tabata coleganan cu tabata siguiendo e noticia na cas puntrando kico nan lo por haci, con nan lo por haci pa yega New York pa yuda. Bomberonan ta “bond” cu otro, tin un amistad y hermandad special y hopi di e bomberonan na Aruba tin bon amistad cu bomberonan di Merca.
Contacto cu New York no tabata posibel y yega pa brinda yudansa tabata ainda mas dificil. Pero e Cuerpo di Bombero di Aruba a compaña nan rumannan Mericano den nan mente y curason. Den transcurso di simannan, luna y añanan cu a pasa, nan a ricibi bishita di bomberonan cu a traha na “Ground Zero” y un di nan hasta a trece un helm cu el a uza durante di e tragedia pa Cuerpo di Bombero di Aruba como un gesto special di hermandad. Comandante de Cuba a trece e helm na e conmemoracion y a pone dilanti di e podium unda cu e diferente oradornan a papia.
Minister President Eman a comenta cu e compromiso mas fuerte cu humanidad por haci den memoria di tur e personanan cu a perde nan bida, pa contribui cu curasonnan habri na comparti cu personanan di tur diferente fe, pa crea un mundo unda cu ningun hende ta wak color, ni religion.
Minister Dowers a agrega cu e tragedia di 9/11 a cambia e forma cu nos ta mira e mundo moderno, no solamente pa cu aspecto di siguridad, pero tambe pa cu control di frontera. E tarea di mantene siguridad no ta uno facil y cu e tragedia a trece hopi hende, organisacion y entidad hunto pa duna realce na e aspecto siguridad rond mundo. E titular di husticia a gradici Cliff Faldman pa e amistad cu e tin cu Cuerpo di Bombero y pa organisa e evento di conmemoracion, y a gradici servicionan di bombero, ambulance y polis pa tur nan esfuersonan na beneficio di e ser humano.
Hustamente na momento cu Minister Dowers tabata cabando cu su discurso un grupo grandi di miembronan di Cuerpo di Bombero y Rescate Nacional a haya un melding pa acudi na aeropuerto pa un avion di carga cu tabata realisando un aterisahe di emergencia. Inmediatamente nan a sali pa eherce nan funcion di cumpli cu e tarea na cual nan ta dedica cu pasion y determinacion, pa sigura cu tur medida di siguridad ta wordo tuma y cu ta haci tur lo posibel pa salba bida humano na prome luga.
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu 160 empleado, di cual 112 ta traha activamente cu combatimento di candela. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto.