Dos siman pasa dos stagiaire di Colegio EPI, esta Samanta Hernandez y Jean Pierre Jansen, a acerca Cuerpo di Bombero y Rescate Nacional cu un peticion special. Despues di e prome contacto cu Ferdinand Ponson relaciona cu un programa di prevencion di candela cu e studiantenan kier a organisa pa nan clientenan di Centro Man Na Obra, Ponson a extende casi inmediatamente un invitacion pa e 75 clientenan y 16 lidernan di grupo bishita e Kazerne di Brandweer situa na Tanki Flip pa un tayer.
Samantha Hernandez a splica cu como studiante di EPI, Sector Salubridad y Servicio nan tin un stage di ocho siman cu un instancia cu tin di haci cu nan futuro trabao. Nan a siña conoce e clientenan y a crea un relacion ameno cu nan. Como parti di e stage nan a organisa un programa di prevencion di candela, cu nan a completa cu e bishita na Brandweer. El a agrega cu despues di e actividad ainda lo tin un sesion di pregunta y contesta ora nan bolbe na Centro Man Na Obra.
Pa cu e preparacion pa e bishita, Jean Pierre Jansen a splica cu nan a comparti tips cu e clientenan tocante prevencion di candela, manera e number cu mester yama y kico pa haci si tin gas den cas. E sesion di informacion na e Kazerne mes tabata den man di Francis Toussaint.
E miho luga pa organisa un workshop pa un cantidad di persona asina grandi ta na e Kazerne principal, como cu aki nan por a experencia tambe diferente aspecto di e trabao di Brandweer. Asina a invita e clientenan pa experencia kico e ta pa traha como miembro di Brandweer; nan a subi riba e truck, den e hoogwerker y nan tabatin mag di spuit awa uzando e ekiponan.
Un di e tipnan cu mas a capta nan atencion ta e prohibicion di mantene boter di gas chikito paden di cas. E feedback riba tur puntonan tabata inmediato y nan a siña tur cos hopi lihe, segun Ponson. E experiencia tabata uno extraordinario tanto pa tanto pa e clientenan di Centro Man Na Obra como pa e miembronan di Cuerpo di Bombero. Tur participante a keda hopi contento cu e actividad asina bon organisa pa e dos studiantenan di EPI. Nan a pasa un dia pret y masha dushi hunto y a desea Samantha y Jean Pierre hopi exito cu nan estudio y futuro carera.
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu 160 empleado, di cual 112 ta traha activamente cu combatimento di candela. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas of menos 1600 melding, cu ta varia entre combatimento di candela, rescate, yudansa special y trabounan na aeropuerto.