Enconexion cu e caso di asesinato cu a tuma lugar dia 15 di januari 2021 Recherche di San Nicolas (DAR3) a detene un persona masculino di inicialnan B.D.W. naci na Aruba di 23 aña. Cu e detencion di Brandon, awo ta dos ruman tin deteni pa e mesun caso.
A detene e sospechoso aki na su cas den Caya Sint Lucia. Cu e detencion aki ta bira un total di 4 deteni den e caso. Investigacion preliminar ta mustra cu ta un problema entre gangnan.
E caso di asesinato tabata riba e hoben Leonardo Ignacio, kende sinta den su auto den cura di su cas, hunto cu su yiu, a haya un tiro mortal den cabes.
Pa e caso aki a detene den luna di april dos mucha homber, Yael Frans y Joshua Wouters. Awe a detene e ruman di Joshua.
Brandon net prome cu detencion di e dosnan aki mester a biaha pa Colombia, ya cu el a keda afecta y den rolstoel di un tiro cu el a ricibi den Village poco mas cu dos aña pasa. Awo ta bay determina ki su rol tabata den e asesinato di dia 15 di januari. Si e tabata e cerebro of a yuda traha e plan.
Pa Cuerpo Policial por resolve mas caso cooperacion y informacion di pueblo di Aruba ta hopi importante, p’esey ta pidi si bo tin cualkier informacion yama tiplijn: 11141. KPA ta garantisa cu bo ta keda anonimo.