Aruba Bank a tene su prome “Aruba Bank Student Chef Challenge” cu a trece restaurantnan prominente, nan Chef, studiantenan di sector Horeca di EPI, y expertonan den e ramo hunto durante di un anochi ameno. E plataforma organisa y patrocina pa Aruba Bank ta sostene e generacion nobo di chef den nan esfuerso pa “showcase” nan habilidadnan culinario na clientenan corporativo di e entidad financiero y gana experiencia valioso den un formato competitivo.
E studiantenan tabatin e reto pa forma un team consistiendo di e Chef, “Team Member” y e studiante di EPI. Nan mester a prepara hors d’oeuvres pa e invitadonan di Aruba Bank y realisa un presentacion bibo preparando nan hors d’oeuvres durante e evento pa tres miembro di hurado. E hors d’ oeuvres mester tabata tin e toque crioyo y ademas creativo.
E evento a tuma luga na Aruba Bank Main Street Express Branch Plaza cu participacion di Gianni’s, Papiamento Restaurant, Barefoot y Screaming Eagle.
E agenda di e anochi a inicia cu presentacion di Alvaro Yi cu a representa Gianni’s hunto cu Chef Cristiano. Despues a sigui e presentacion di Cindy Regales cu a representa Papiamento Restaurant hunto cu Chef Hector Ramirez, pa continua cu Thailisah Dijkhof cu a representa Barefoot hunto cu Chef Jari Gerrit aan het Rot. A finalisa e anochi aki cu presentacion di Brandon de Windt hunto cu Erwin Husken di Screaming Eagle Restaurant.
Brandon de Windt a gana e prome Aruba Bank Student Chef Challenge representando Screaming Eagle kendenan a prepara “Creole le mousse”.
Brandon a ricibi como premio un bunita trofeo y un premio en efectivo y tur participante a ricibi un certificado di participacion.
Aruba Bank ta yama pabien na tur studiante cu a participa como tambe na e restaurantnan, pa e bunita trabao cu nan a haci hunto. Tabata un tremendo team building y un ocasion special pa motiva e studiantenan pa haci networking den loke ta bay bira nan futuro area di trabao. Un biaha mas pabien na un y tur.