E boto y curpanan cu Kustwacht a descubri recientemente riba alta mar, probablemente lo ta di Africa.
Manera ta conoci, diadomingo e DASH di Kustwacht cu ta patruya den Caribe a bin topa cu un boto na casi 130 miya nort di Aruba (e distancia entre Corsou y Aruba ta mas o menos 68 miya, locual ta nifica cu unda e curpanan a wordo haya ta dos bes e distancia aki).
A manda Panther bay direccion di e punto indica, pero e situación tabata hopi difícil pa touw e boto aki trece tera. Lama tabata bruto, olanan halto y cabuya a kibra na diferente ocasion. E curpanan tambe tabata den un estado di descomposicion avansa, cu ta indica cu nan lo tabatin rond di 10 dia of mas morto caba.
E pregunta ta kende e hendenan aki ta? Tur cos ta mustra cu probablemente ta personanan di e continente Africano cu tabata trata di yega Islanan Canario, pero debi na problema di tempo, a desvia completamente.
E boto no tabatin motor, locual ta nifica cu nan tabata depende di nan mesun forsa pa crusa for di nan pais pa Islanan Canario. Recientemente a haya un boto similar ta drif cu solamente un hoben (mucha muhe) abordo), ya cu tur e otronan a muri na caminda den e intento pa busca un miho bida.
Personanan cu conocemento di e tema aki ta bisa cu e boto den cual a haya e curpanan ta specifico di Mauritania, principalmente di un puerto na Africa, esta Nouakcachott. Esaki ta e punto di salida mas logico pa esnan cu kier yega Islanan Canario, saliendo for di West Africa.
E biento y e stroming a pone cu nan a perde completamente for di nan ruta. Y e distancia entre Africa y continente Americano t’asina grandi, sin nada memey. E distancia entre Mauritania y Aruba ta 6,330 kilometer y un tanker normal lo tuma mas cu un luna pa yega aki banda, navegando 10 nudo pa ora.
E biahe di e grupo aki ta keda un misterio ya cu Kustwacht no a logra trece e boto tera y niun hende sa si nan a fayece door di e circumstancianan of tabatin un crimen envolvi.