Autoridadnan di Colombia a indica diadomingo cu e mortonan pa motibo di e naufragio di un embarcacion cu por lo menos 150 persona aborto, a hisa pa dies, mayoria di nan turista, cerca di un embalse den e localidad Colombiano di Guatape (noordoost).
“Te na e momento e balans ta dies persona fayeci, 30 herido cu ta wordo atendi den e hospital di Guatape y extraoficialmente ta bisa cu tin 10 persona desapareci,” directora di e Departamento Administrivo di Prevencion di Desaster (DAPARD), Margarita Moncada, a indica.
Di su parti, e presidente Colombiano, Juan Manuel Santos, a afirma cu seis di e victimanan a wordo identifica, segun e emisora Caracol Radio a informa.
E barco, di cuater piso y di e nomber “El Almirante,” a sink banda di 2’or di merdia, mientras cu e tabata nabega cerca di e pier, unda cu tabata tin e comisaria di polis di e localidad, foco di turista den dianan festivo, segun varios testigo a confirma.
Un testigo cita pa Caracol Radio, a señala e hundimento a tuma luga despues di a scucha manera un “kraak” den e embarcacion. Den e zona ta opera ekiponan di rescate, cu ta conta cu e respaldo di un helicopter di Forsanan Arma.
Fuente: http://www.europapress.es