Willemstad Curacao:
Djadumingu último Sentro Operashonal Marítimo di Wardakosta (MOC) a risibí un notifikashon di un boto di piskadó lokal ku tabatin problema. E kapitan a informá MOC ku su boto tabata yenando ku awa i ku ya e awa a alkansá nan rudia. MOC inmediatamente despues di e notifikashon di e kapitan, a tuma kontakto ku punto di sosten di Wardakosta na Hato pa laga e helikòpter sali pa asistí e personanan a bordo di e boto. Un otro boto di piskadó tambe a nabegá bai kaminda e boto den nesesidat tabata pa yuda esaki ku un pòmp pa saka awa.
Na momentu ku e helikòpter di Wardakosta a yega na e sitio, e dos personanan ku tabata a
bordo di e boto a keda hisa ku e helikòpter, esaki pa nan seguridat. E boto lokal ku kier a duna yudansa pa medio di e pòmp na yegada na e sitio ya no por a hasi nada mas. E boto di piskadó lokal a senk di tal forma ku ya no por a skapa esaki. E dos personanan a ser hiba sano i salvo Hato pa nan por a regresá kas.
