Willemstad Curacao: Diahuebs anochi e Sentro di Reskate di Warda Kosta a detektá un kontakto sospechoso den bisendario di e entrada di Spaanse Water. Mesora RCC a manda e helikòpter di Warda Kosta pa bai na e sitio pa por lokalisá e boto. Na yegada di e helikòpter a mira un speedboat ku 17 persona riba dje. E personan tur a bula na awa na momento ku nan a mira e helikòpter di Warda Kosta. Tur a landa bai kantu i subi tera drenta mondi. Mesora RCC a dirigí Polis i Duana tambe na e sitio pa por reforsá e tim di Warda Kosta. Bon kolaborashon i trabou di Warda Kosta huntu ku Polis i Duana a logra ku a detené tur e 17 personanan indokumentá. E grupo tabata konsisti di 15 hende hómber i 2 hende muhé.
Warda Kosta ta informá ku e lo sigui ku su patruyanan intensivo pa purba evitá botonan ku personanan indokumentá yega na nos kostanan. Defensa tambe lo sigui kolaborá ku e barku di patruya di Marina Real Zr.Ms. Zeeland paden i pafó di awanan territorial di Aruba, Bonèiru i Kòrsou. Warda Kosta ta traha di dia i anochi i ta alkansabel riba e number 913.