Presidente di FTA, Sr. Hubert Dirksz a duna informacion riba un CAO cu a keda firma pa un compania nobo. Pa FTA e contrato colectivo aki ta sumamente importante cu a wordo firma y cu tambe por bisa cu e trahadonan oor ta contento pasobra awo nan tin tur nan beneficionan preto riba blanco garantiza y tambe sin laga afor cu e trahadonan den e CAO aki ta bai dilanti riba varios parti pa cu condicionnan secundario riba nan salario cual FTA ta aprecia. Apesar di negociacionnan largo mester bisa cu toch a logra yega na un bon CAO. Tanto den salario, gratificacionnan pa añanan di servicio, bonus di Pasco, vakantie, areglo di spaar y tambe loke ta hopi importante y loke mayoria empresa tin actualmente ta seguro pa bril y tratamento a djiente. Akinan FTA ta gradici tur esnan cu a duna nan apoyo pa yega na na e contrato colectivo aki entre otro Sr. Lennert y tambe Sr. Rudy Geerman, Tito De Cuba y tur e shop stewardnan kendenan tur a haci nan esfuerzo pa logra firma e CAO. Esaki ta bira e prome CAO pa Botica di Servicio y Sr. Lennert a mustra cu e contrato aki tin hopi bon beneficionan pa e trahado y alavez e tambe ta gradici tur e personanan cu a yuda pa logra e firmamento. Aunke cu e proceso tabata uno largo y ta spera awo cu e contrato ta firma cosnan ta mehora pa e trahadonan y asina tur partido por sigui traha bon cu otro.