Durante un conferencia di prensa yama den cuadro di Dia di Diabetico, lo bay tin un evento yama Move-A-Thon relaciona cu World Diabetes Day 2017. Sra. Adrienne Tromp di Botica di Servicio tambe a comenta riba e diabetes cu t’ey presente na Aruba y ta splica dicon ta importante pa para keto cu e tema aki.
Sra. Tromp a splica cu diabetes ta un problema hopi grandi na Aruba. Den estudionan haci a sali afo cu 16.2% di e poblacion ta sufri di diabetes na Aruba, compara cu 8.3% mundialmente. Como tal, e porcentahe di personanan cu ta sufri di diabetes na Aruba ta hopi halto. Tur e organisacionnan a bini hunto pa conscientisa e pueblo tocante e problema di diabetes na Aruba.
Kico ta diabetes?
Diabetes ta ora cu e sucu den bo sanger ta halto y bo curpa no por procesa esaki manera debe ser. E risico pa haya diabetes ta edad halto, si bo ta sufri di presion, si bo tin famia diabetico, si bo ta obeso, tur esakinan ta contribui cu bo por haya diabetes.
COMPLICACION
Complicacionnan ta cu bo ta haya un pia diabetico, es decir heridanan na bo pia cu no ta cura lihe, bo ta haya problema di curason, problema di wowo y problema di riñon. Con pa reconoce si bo tin diabetes? Si bo ta urina hopi, si bo tin hopi sed, si bo tin gevoel cu bo tin hamber cada rato, si bo a perde peso den un corto periodo sin motibo, cansancio, ta wak wazig. Tur esakinan ta sintomanan cu bo ta sinti cu bo ta diabetico. Ta hopi importante pa un persona diabetico pa e hiba un bida saludabel, hiba un bida activo, cana mei ora pa dia, 5 dia pa siman. E ta bon pa biba saludabel, dus come fruta y berdura y tambe si bo ta tumando remedi prescribi door di dokter, pa tum’e tur dia na e momento cu el a wordo prescribi.
Botica di Servicio ta duna e servicio na comunidad di Aruba, tur diasabra fin di luna, un prikdrag gratis unda cu pashentnan por pasa na e boticanan, pa haci un priktest pa sucu y test nan preshon. Nan por haya e informacion tambe, pa wak si nan ta cay den categoria pa haya diabetes, segun Sra. Adrienne Tromp, di Boticia di Servicio. Nan ta traha hopi cerca cu Imsan y Hospital pa conscientisa e comunidad di Aruba cu esaki ta un problema grandi.