Un luna pasa parlamento di Aruba a aproba e “crisisheffing” cu gobierno di Sra. Evelyn Wever-Croes a presenta. Nos por a ripara cu e debatenan den parlamento tabata por lo general di índole politico/populista. Masha poco atenciona a wordo dedica na studia e proposicion di ley debidamente, ni tampoco a dedica atencion na e consehonan di Raad van Advies. Despues cu e baca a hoga, e minister encarga cu finansas a bin ripara kico en realidad e medidanan aki lo
bay tin como resultado.
Ta parce cu e minister tabata spera un “curve-ball”, pero ela haya un”fast-ball” di esnan cu a prepara e leynan cu a ser cambia. No ta nada straño, corda eynan tin hendenan cu a wordo “handpicked” pa AVP despues cu a core na un mal manera cu profesionalnan cu semper a pone Aruba na prome lugar y no a previlegia ningun hende. Na prome lugar e minister y
su conseheronan a comete diferente pifia den preparacion di e ley. No a consulta debidamente cu e sector priva manera banco, companianan di
seguro, panaderonan y otro stakeholdernan. E minister a bay hasta asina leu di acusa e presidente
di e asociacion di banconan, pa despues bin ripara e error garafal cu nan mes a comete. Loke sinembargo a hala mas nos atencion ta e hecho cu parlamentarionan tampoco no a haña necesario pa studia e ley na drechi. Manera expresa anteriorente parce cu nan a prepara nan mes pa defende e posicion di gobierno sin tene na cuenta cu nan trabou ta pa controla gobierno y hustamente defende interés di pueblo.
Ni un parlamentario, ni di oposicion ni esunan cu ta sostene e gobierno no a mira e necesidad di pidi un aclaracion di e kitamento di e exoneracionnan di BBO en general, ni pa e banconan y e companianan di seguro en particular. E repercusión lo ta desvastador ta pa nos pueblo. Ningun a worry cu esaki.
Gobierno a cambia y mayoria di parlamentarionan cu ta sostene coalicion, a vocifera di lo bay ehecuta nan trabou di un forma sensato, critico y proactivo. A denuncia e forma con e parlamento anterior tabata fungi como “cheerleaders” enbes di controla e gobierno debidamente. Despues di 7 luna nos por ripara, lamentablemente, cu e parlamentarionan ta duna muestra di kier sigui e mesun modus operandi cu esun anterior. Ta constantemente defende e maneho di gobierno y critica e parlamentarionan cu a forma parti di e gobierno anterior. Pues e mesun cantaleta di loke nos mester a biba 8 aña largo di e gobierno di AVP. Y envez di a pone esnan
responsabel, responde pa nan actonan pa e desaster di ultimo 8 añanan, ta e pueblo ta esun cu a wordo hiba na e altar di sacrificio y cu entrante 1 di juli lo mester bay paga, no solamente pa e debe, sino pa e debenan den futuro cu e gobierno actual tambe ta hincando nos pueblo aden.
UPP a bin ta denuncia proposicionnan di maneho dudoso di cierto ministernan den e gobierno nobo. UPP a hasta manda un carta pa parlamento pa roga nan hasi un investigacion pa determina si tin motibo pa e preocupacionan menciona den nos carta. Nada no a sosode.
Alcontrario parce cu parlamento a cay den un silencio hermetico y mescos cu e ministernan di MEP a disidi di apoya e caprichonan di vooral minister Otmar Oduber. Manera cos ta mustra ta simpelmente acepta cu Otmar, e scorpion octopus, lo bay paga su financista back. Pa colmo ta usa MEP, cu ta e dori, pa hustifica e “pay-back” aki.
Otmar ta sigui menosprecia e partnernan den coalicion. E dealnan parce di ta palabra caba. Otmar a bisa na television cu “de facto” ya a tuma e desicion cu lo bin un incenirator pa “Waste to Energy”!! Un biaha mas parlamento lo bay haya den un teblachi di oro un “done deal” cu e scorpion ta presenta na nan y cla pa pica nan man si na tribi di bisa algo. Un pica di e scorpion aki lo nifica fin di e coalicion aki y ayo stoel dushi di parlamentario. Consequencia lo ta cu nos lo tende den koor: “VOOR”!
Atrobe falta di transparencia den ehecucion di nan trabou como parlamentario y otro muestra di kier simpelmente mantene nan gobierno na poder. Nos mester constata pues cu e parlamento nobo atrobe ta biento en popa pa bira un stempelparlement, pero e biaha aki cu un poco mas show. Interes partidista y di cierto comerciantenan previlegia ta bin atrobe
na prome lugar.
Booshi Wever
Lider partido UPP
10 juni 2018