Booshi Wever (UPP): Draaimento di un mentira no ta hasie ni un mita berdad!

0
RBC Juli 2018
Funmiles-2018

Ta un tristo realidad cu pueblo tin por lo general un memoria cortico, te ora cu e realidad dal duro y lant’e for di soño. E lamento lo cuminsa, pero lamentablemente laat, pasobra ya caba e daño ta haci y no tin paso atras. Un ehempel recien ta e desaster financiero cu e gobierno anterior a laga atras, cu e “sprookje” di Green. Nos pueblo hunto cu parlamento a para wak sin haci nada.

Nos a denuncia na diferente ocasion e forma con e minister Otmar Oduber y Serlimar ta trata na hustifica un maneho ad-hoc, sin cu a presenta un plan integral y sin cu a responsabilisa  cuanto e maniobranan di e minister lo bay costa pueblo, mientras cu ta compromete nos pais financieramente. Nos mester constata cu, los di algun periodista critico, masha poco atencion a wordo dedica na e topico aki. Ta parce cu e fiesta cu tabata tin den e gobernacion anterior, unda tabata tin periodistanan comprometi, ta sigui. “Geen haan die ernaar kraait”!!

E minister parce di tin aprobracion di e gobierno y parlamento. Pues caminda ta hancho habri pa dealnan wordo sera y Serlimar tin e permiso pa cuminsa manipula opinion publico cu informacionnan incorecto.
Recientemente Serlimar, cu tin un batayon di hende den e departamento di Marketing pa manipula, a publica den medionan di comunicacion y riba su facebook un articulo na unda ta relata diferente punto cu nos ta haya nos mes obliga pa reacciona. Den e articulo aki a cuminsa cu e manipulacion pa purba di romantisa y hustifica e “sprookje” di Otmar Oduber.

Na prome lugar ta argumenta cu despues di 60 aña ainda ta deposita desperdicio na Parkietenbos. Ta berdad cu ainda desperdicio ta wordo deposita, pero a lubida di menciona cu durante gobiernacion di MEP a bin un solucion real, sostenibel, tanto pa nos medio ambiente como financieramente . Pero cu esaki a wordo boycotea entre otro door di e minister actual di medio-ambiente hunto Benny Sievinger.  Pa 8 aña largo, den locual e minister actual a participa 7 aña, TUR cos a wordo haci pa e solucion cu MEP a bin cun’e, fracasa. Den e sentencia di 16 di februari 2016 (A.R.no.1041 van 2011) huez a bisa cla y raspa cu gobierno di AVP/POR a boycotea e proyecto dor di e.o. no percura pa diesel, pieza, lubricacion necesario, tira crankshaft etc.etc.

Serlimar ta argumenta cu e proyecto di Bouldin & Lawson (B&L) a fracasa, pasobra diferente investigacionnan lo a constata cu e fluff lo tabata contamina. Si encaso esey ta berdad, ex-minister Sevinger hunto cu Otmar Oduber lo a haci drama y fiesta  den Parlamento cu e investigacionnan aki. Nos ta sigur cu tanto Benny Sievinger y Otmar Oduber lo a zwaai cu e documentonan aki mescos cu a zwaai cu e “maandverband” den parlamento of mescos cu Otmar Oduber tabata zwaai cu e “huurcontracten” di Papa, Tanchi, Ruman etc.
Alabes  lo a uza e investigacionnan aki pa desacredita B&L den e tantisimo casonan cu gobierno a perde den corte contra B&L. Y por ultimo Serlimar lo a uza esaki tambe for di un principio como argumento pa no uza B&L como un posibel opcion. Pero alcontrario, e minister a hasta
invita B&L pa bin evalua e planta recientemente y a paga un par di mil dolar pa nan bin Aruba.

Despues cu a perde varios caso caba Otmar Oduber y su gang di Alibaba a paga un compania amigo pa bin cu un raport cu e solo meta pa hustifica e boycot di e proyecto aki. Y den e raport ey den pura y sin cu niun hende sa, a gaña haci un test, despues cu e planta ya tabata tin 2
aña for di servicio. Den mesun sentencia di 16 di februari 2016 huez a bari e raport mediocre aki completamente for di mesa na unda na un manera hopi cla huez a declara cu e fluff ta cumpli cu loke e contract ta bisa, esta cu e ta cumpli cu e normanan di USEPA.  Apesar di e sentencia aki toch e makinaria di propaganda di Otmar Oduber, por medio e departamento di Marketing di Serlimar kier uza e mesun raport aki pa bin cu e manipulacion aki.

Otro argumento ta e Sero di Teishi. Aki ta COBA un buraco, contrario na loke a ser bisa anteriormente door di e minister cu lo uza e “environbales” pa yena e buraconan existente riba nos Isla. Pa colmo a “lubida” di proteha  e tereno door di pone “liners” prome cu a pone e bale-nan. Benta e “environbales”  aki sin “liners”  por ta daniño pa nos medio ambiente. Unda e NGO-nan ta keda?
Straño ta cu Serlimar tin e bultonan di “liners” warda na San Nicolas y no ta conoci desde cuando y kende a paga pa cumpra e “liners” y pa colmo sin cu tabata tin un destaho publico pa esaki.
Den e Decreto Ministerial di dia 17 di december 2017 na unda ta apunta cu Sero di Teishi tambe lo ta un LANDFILL, ta poni cu ECOGAS MES lo mester haci e testnan bou supervision di Directie Natuur en Milieu(DNM). Pregunta ta cuanto biaha esaki a ser haci desde cu a
cuminsa dump e saconan di plastic den e buraconan recien coba?? Alabes ta stipula cu esaki mester ta conforme e “vastgestelde normen” di DNM. Ta interesante pa sa na unda esakinan a wordo publica??

Ta di lamenta cu ni e NGO’s riba tereno di medio-ambiente ni Parlamento a haya necesario pa pidi e minister aclaracion riba e proyectonan cu e minister ta laga ehecuta di un forma ad-hoc. No ta responsablisa cuanto e dealnan aki ta costa e caha di gobierno of e saco di e ciudadano.  Tampoco ta cuestiona cuanto e plan den su totalidad lo costa y con lo bay paga pa esaki. Ta nombra dos director na Serlimar, tur dos cu un salario astronomico, ta haci nombracionnan
di personal, mientras a keda palabra cu CAft cu lo reduci e cantidad di personal. Y por ultimo ningun hende ta puntra kende ta doño di e compania cu ta encarga cu seguridad riba dump. Segun informacion ta propiedad di un parlamentario cu ta sostene e coalicion esaki ta. Of e tambe a core pone e compania aki bou nomber di otro hende?

Que siga la fiesta y vooral pa e representantenan di e partido POR cu ta sigui cu derochamento di placa, mientras esnan di MEP mester hala faha mara y nos pueblo cu su silencio lo wordo “recompensa” despues cu otro aumento di e “kartelheffing” di e minister di POR.

 

 

26 juni 2018

Comments

comments

C: Heineken
new india