Aruba ta confrontando un situacion socio-economico dificil. Un situacion cu ta exigi entre otro un maneho estricto y responsabel cu mester conta pa turminister, manera CAft y Raad van Advies a bin ta argumenta. E situacion penoso aki no a cay for di cielo. E culpabel tin un nomber y faam y esey ta AVP (inclusivo Otmar c.s.) y Parlamento di Aruba cu no a cumpli cu su deber di defende patrimonio di nos pais y controla gobierno debidamente. Pueblo ta spera un Parlamento mas critico y pendiente pa defende e interes di pueblo y no un otro “stempelparlement”. UPP ta consciente tambe cu e tarea riba tereno di finanzas publico lo ta exigi hopi curashi y disciplina y lo no ta facil pa sali for di esaki. UPP ta para 100% tras un maneho di austeridad, pero unda cu ta e gobernantenan ta mustra e seriedad necesario y no sigui cu maneho di the “sky is the limit” pero e cuenta ta wordo presenta na pueblo.
Pa por duna contenido real na un democracia bibo, ta necesario pa nos tin un Parlamento cu e pasion y e dedicacion pa defende e interes di e pueblo, sin tene na cuenta si ta trata di un amigo politico of no. Prueba cu esaki ta posibel nos por a ripara ora parlamentario Tevreden di MEP, despues cu mi persona a publica un articulo riba e asunto di dump, a cuestiona e ponencia di minister Otmar Oduber encuanto e posibel solucion pa dump. Ela mustra riba e hecho cu e situacion actual ta rekeri di inversion riba diferente tereno. Gobierno mester delinea prome cua tereno tin PRIORIDAD y lo wordo atendi prome. Y no por ta asina cu sin mas, sin atende cu Parlamento ta aproba e suma di 150 pa 200 miyon dollar cu lo mester segun e minister, pa soluciona dump.
Mi ta urgi e parlamentarionan critico pa cuminsa haci pregunta pa dos caso cu lo por hinca Aruba den mas debe y tur esaki pa yuda nan imago (Besaril) y “pay back time” pa sponsernan (Otmar Oduber).
E prome casota toca minister Besaril na Hulanda. Den transcurso di siman pasa, mi a haci remarke riba facebook riba un articulo cu a sali publica recientemente na unda e Minister Plenipotenciario a señala cu mester huur un edifico na Den Haag. Den e articulo ey, e MES ta haci mencion cu e edificio cu kier bai huur, na 1996 (22 aña pasa) tabata costa 850.000 florin pa aña (rond di 71 florin pa luna). Den Solo di Pueblo e minister a reaciona riba mi ponencianan, sin menciona mi nomber, y a bisa entre otro cu ami no lo tin e derecho di expresa mi opinion, pasobra den ultimo eleccion pueblo lo a desaprobami.
Tambe e minister ta opina cu e edificio no ta di Aruba, pasobra e ta hipoteca y por ultimo e minister a laga sa cu mester muda, pasobra e estado di e edificio ta bastante deplorabel.
E minister mester stop di “beat around the bush”. Mi persona no ta importante awor, pero si e suma y motibonan cu e minister ta uza pa dicidi di huur un otro edificio. Si tin un quotation haci door di un arkitecto renombra e ora e pregunta ta con e suma aki ta compara cu e gasto di huurmento di un edificio y renovacion di e edificio actual? Otro ponencia di e minister cu Aruba no ta doño di e edificio ta un hilaridad y hasta por wordo denomina como un “juridische kolder”. E edificio TA di Aruba y e unico motibo pa perde esaki ta si no paga e hipoteca y te asina leu cu mi sa esey no ta e caso. Y sigur no falta mucho pa e ta paga completo.
Un otro caso ta trata dump y e intencionan cu e minister tin cu Serlimar. Ta circula rumornan di un “supuesto” solucion cuestionabel y un probable “fixed bidding” tumando lugar cu dump como tambe posibel ireguralidad sosediendo na Serlimar. Nos lo bay dirigi un carta oficial pa Parlamento, pa mustra riba e modus operandi di e “Scorpion” cu a bira e “Octupus” den e gobierno aki tambe, mescos cu e tabata haci den e gobierno criminal di AVP (aunke tin hopi cu kier pa pueblo lubida esaki)!!
Aparte di e “fixed bidding” pa compra di 22 truck pa Serlimar (ya cu kier reemplasa truck cu apenas ta 5 aña bieu), proximamente aparentemente varios oficina di Serlimar lo muda pa e edificio na unda e “keuringslokaal” tabata situa. Aki ta mesun modus operandi. Ta sali for di un edificio cu ta di gobierno, unda NO mester paga huur pa bay den un edificio unda mester bay paga huur. Ora cu mi tende nomber di e doñonan di e edificio mi por comprende dicon Otmarcito a bira loco paso su “partner in crime” a wordo perhudica ora cu a muda DTI y bay huur un otro localidad. Kico di berdad tin cu ta dos sponsor grandi y casi doño di POR ta doñonan di e edificio aki?? Mi a compronde cu un di nan ta un Hulandes-Europeo.
Cumpli cu democracia ta encera cumpli cu reglanan di bon gobernacion particularmente den e tempo nan aki, cu gobierno mester draai cada debchi. Pero ta parce cu pa un ta conta cu “the sky is the limit” y pa otro esaki no ta e caso! Y e peso ta wordo poni con cu bay bin riba e pueblo, cu tin di bay paga pa mas belasting, recogemento di sushi, costonan di energia mas halto. A culpa e gobierno anterior di derochamento di placa, wel aki Parlamento mester exigi for di gobierno y e mandatario pa presenta cifranan real. Mescos tambe cu e raportnan cu nan ta papia di dje. Haci nan publico pa pueblo. Esaki ta nos contribucion na bon gobernacion pafor di Parlamento.
Y por ultimo ban spera cu Parlamento tambe tira piedra den e pos cu Sr. Besaril ta trece padilanti den su reaccion, pasobra ta esey ta su deber y ban spera cu e pos no resulta di ta un “beerput” cu no lo kier pa wordo destapa. Ami lo keda como politico y particularmente como ciudadano di e Isla aki, y como un ARUBIANO di pura sepa, alerta y semper na vanguardia pa defende e interes di e pueblo!! Booshi no ta importante, pero e pueblo ta importante! Y pa sigui haci esaki te na mi ultimo rosea, mi no mester di permiso di Sr. Besaril, cu si e ta gusta of laga!