Kralendijk: Riba djárason 15 di febrüari 2023 Tourism Corporation Bonaire (TCB) den koperashon ku Bonaire International Airport (BIA) a yama bon biní na e promé buelo karibense di JetAir (AUA-BON) ku un saludo di awa, komo parti di nan buelo inougural pa nos isla.
Ku un goodiebag boneriano TCB a yama bon biní na tur bishitante ku a yega, komo muestra di apresio. Riba djárason JetAir ta bula di Aruba pa Boneiru i riba djabièrnè nan ta bula bèk pa Aruba.
E direktor di TCB, Miles B M Mercera a deklará: “Esaki ta un logro importante pa e konektividat hulandes karibense. TCB ta rekonosé importansia di buelo èkstra entre e islanan hulandes karibense, pa motibu ku Aruba i Kòrsou ta forma parti di nos tòp 8 merkadonan di origen mas importante. E próksimo eventonan kultural manera Karnaval, Dia di Rincon i nos Regata di Boneiru anual lo probechá enormemente di e servisio akí pa nos isla.”
“Nos ta kontentu pa Boneiru ku JetAir ta ofresé konekshon nobo pa Aruba, Kòrsou i Sint Maarten. Nos ta mira ku e demanda pa konektividat entre e islanan ta keda fuerte i JetAir ta un adishon hopi bon biní ku nan djètnan kómodo i rápido’, segun Maarten van der Scheer, direktor di BIA.
JetAir a introdusí konektividat entre Boneiru i Kòrsou tambe, ku buelo riba djárason pa Kòrsou i riba djabièrnè bèk pa Boneiru.
TCB a organisá un seremonia titulá #ItsInOurNaturepa e tim den Tecnobar Airport Bonaire pa yama bon biní na e promé buelo ofisial pa nos isla.
