Boneiro: Promé seshon di enfoke den grupo pa e plan maestro 2030 ku e tema ‘Kultura, Norma- i Balornan’

Kralendijk– Djasabra último Entidat Públiko di Boneiru a organisá e promé seshon di enfoke den grupo ku e tema ‘Kultura, Norma- i Balornan’ komo kontribushon pa e Plan Maestro 2030. E seshonnan di enfoke ta un profundisashon mas aleu di diferente tema importante di e komunidat boneriano. Meta di e seshon aki tabata pa akumulá kontribushonnan konkreto pa e Plan Maestro 2030 di parti di e ‘stakeholder’-nan di e sektor kultural. E seshon kultural aki a tuma lugá parti mainta na Mangazina di Rei kaminda 23 organisashon kultural a bishitá.

Organisashonnan ku a partisipá tabata entre otro; Fundashon Akademia Papiamentu, Fundashon Deportivo Kultural, Museo Boneiru, Fundashon Skol di Músika Boneiru, Parokia San LudovicoBeltran, Trasame i diferente mas. Diputado Nina den Heyer a habri e mainta enfatisando na e partisipantenan kon importante nos kultura ta i dikon nos mester traha huntu pa dileñá meta i direkshon kultural pa e sektor aki den e masterplan 2030. E mainta tabata unu interaktivo kaminda partisipantenan a keda dividí den diferente grupo pa asina diskutí tokante 4 tópiko kultural kual tabata; herensia tangibel, herensia intangibel, selebrashon i ekspreshon kultural; norma i balor. Komo promé tarea kada grupo mester a reflekshoná i pensa dikon e tópiko spesífiko ku nan tabata trata ta nesesario i kua ta e meta deseá ku nan kièr logra pa ku esaki. Despues di e promé tarea aki tabatin un pousa kòrtiku kaminda Lendon Emelius, un hóben talentosoku a partisipá i gana diferente título den e kompetensia di Arte di Palabra a deklamá algun di su poesianan ganadó. Durante e di dos parti di e mainta tabata kaminda kada grupo mester a profundisá nan mes den e tópiko i diseñá algun soñonan; notando tambe kon pa plania i ehekutá esaki, alabes debatí riba kiko por hasi mihó i pensa riba rekursonan ku mester pa realisá e soño.

Na final kada grupo a presentá i kompartí nan ideanan. Algun di e ideanan ku e seshon a produsí pa e Plan Maestro 2030 tabata entre otro; Rèspèt pa Papiamentu pa medio di bon uso di esaki; Introdukshon di Edukashon Kultural (for di krèsh te ku enseñansa profeshonal intermedio); Stimulá interakshon entre diferente generashon i bou di bishitantenan/migrantenan riba nos isla; Un maneho kultural sostené pa e medionan nesesario; Lanta un sentro kultural (hadrei kultural); Mira e hende mas felis i konektá ku su kurpa, mente i alma; Famianan fortifiká; Mas embolbimentu sosial i krea apresio pa lokual nos tin.

E meta awor ta pa inventarisá tur e punto nan ku a bini dilanti durante mainta i prioritisá esakinan. Ta bai evaluá tambe kua ta e puntonan ku a bini mas tantu dilanti dor di diferente organisashon pa asina inkluí esakinan den e plan maestro 2030. Ta importante pa den a e Plan Maestro 2030 tur sektor ta aliniá ku otro pa asina krea un sinergia den e metanan di kada sektor pa e Boneiru ku nos ke mira na 2030.
E siguiente seshon tin komo tópiko energia sostenibel i teknologia ku lo tuma lugá riba djabièrnè 28 di febrüari benidero.

Comments

comments