Kralendijk Boneiro: Diferente detenshon pa manehá bou di influensia
Riba djadumingu 7 di mei a detené un hòmber di inisial F.J.B.A. di 58 aña di edat en konekshon ku manehá bou di influensia. Esaki despues di un notifikashon ku a drenta di un outo ku tabata kore zeilu riba kaminda. Un patruya a topa ku e outo indiká i a duna e shofùr señal pa para pa un kòntròl.
E sospechoso no por a kumpli ku e tèst di supla. A detené i hib’é warda di polis pa un análisis di rosea. En konekshon ku resultado, a kita su reibeweis.
Riba djasabra 6 di mei a detené un hòmber di inisial J.A.A.C. di 51 aña di edat en konekshon ku manehá bou di influensia. Un patruya a para e sospechoso pa un kòntròl despues ku a mir’é ta kore zeilu riba kaminda. A konsekuensia di e resultado di un tèst di supla ku a hasi kuné, a detené i hib’é warda di polis pa hasi un análisis di rosea. En konekshon ku resultadonan, a kita su reibeweis. A hiba e vehíkulo di e sospechoso warda di polis.
Den oranan di anochi riba djabièrnè 5 di di mei a detené un hòmber di inisial C.V.M.H. di 32 aña di edat. E sospechoso tabata envolví den un aksidente entre dos vehíkulo riba Kaya Korona. El a haña un prosèsferbal pa manehá sin reibeweis i a detené pa manehá bou di influensia.
Ladronisia di kabritu
Alrededor di 7 or di anochi riba djasabra 6 di mei, ‘meldkamer’ sentral a haña notifikashon di ladronisia di kabritu den un kunuku na Lagun. Na yegada di e patruya a topa ku doño di e kunuku i tambe outo di e sospechoso. Doño di e kunuku a deklará ku el a gara e ladron di kabritu na momentu ku e tabata mata un kabritu. E sospechoso a kore bai despues ku doño di e kunuku a kore su tras. Na dado momentu e sospechoso a para i menasá doño di e kunuku ku un kuchú. Aki doño di e kunuku a stòp ku e persekushon i e ladron di kabritu a logra hui. Su siguiente dia, riba djadumingu 7 di mei, a duna òrdu na doño di e outo pa mèldu su mes na warda di polis. Aki a detené un hòmber di inisial N.J.H. di 58 aña di edat en konekshon ku ladronisia i destrukshon. Investigashon den e kaso ta andando.
Detenshon pa maltrato
Den oranan trempan di mainta riba djasabra 6 di mei a detené un hòmber di inisial N.L.L. di 50 aña di edat na Kaya Karaña en konekshon ku maltrato severo ku un arma. E sospechoso a maltratá un hòmber ku un pida palu. Ambulans a transportá e víktima pa hòspital pa tratamentu médiko. Ta investigando e kaso.
Ladronisia di skuter
Riba djabièrnè 5 di di mei a drenta keho di ladronisia di un skuter koló shinishi di e marka Symorbiz, numerá MF-1791. E skuter tabata stashoná na lòk na un kas situá na Kaya Socrates. Deskonosínan a bai ku e skuter entre 10 or di anochi riba djaweps 4 di mei i djabièrnè 5 di mei, 9 or di mainta. Ta investigando e kaso.