Outo hòrta
Riba djaluna 9 di yanüari a drenta keho di ladronisia di un outo kolo maron kla/oro di marka Hyundai, modèl Santa Fe, numerá B-15658. Ta investigando e kaso.
Kaso di bringamentu
Den oranan di anochi riba djadumingu 8 di yanüari un kaso di bringamentu a tuma lugá na un establesimentu nokturno situá na Kaya Boneiru. Durante esaki un hòmber a sali herida i ambulans a hib’e hospital pa tratamentu médiko. A detené e otro persona enbolbí, un hòmber di inisial S.R.S.P. di 22 aña di edat en konekshon ku maltrato. E bringamentu a start despues ku e personanan enbolbí a dal nan outo den otro na un otro sitio i un di e shofùrnan a kore bai. A konfiská ámbos outo pa mas investigashon.
Aksidente entre outo ku bròmer
Alrededor di 6.30 or di atardi, riba djadumingu 8 di yanüari, un aksidente entre un bròmer i un outo a tuma lugá na salida di Rincon, na altura di Mangazina di Rei. A detené e shofùr di e outo pa manehá bou di influensia di alkohòl. Ambulans a transportá e shofùr di e bròmer pa hòspital pa tratamentu médiko. Dor di e aksidente tráfiko pa drenta i sali Rincon tabata stanká pa basta un ratu.
Aksidente kaminda di Rincon
Alrededor di 12 or di mèrdia riba djasabra 7 di yanüari un aksidente a tuma lugá riba kaminda di Rincon nèt despues di e bògt di Gurubu. Un outo a kore drenta mondi despues ku e shofùr a pèrdè kòntròl dor di e kaminda ku tabata muha. Personal di ambulans a kontrolá e shofùr na e sitio mes despues di kua e por a bai kas.
Kandela den restorant
Riba djabièrnè 6 di yanüari, meldkamer sentral a risibí notifikashon tokante un kandela den kushina di restorant situá na Kaya L.D. Gerharts. Brantwer a akudí na e sitio i a paga e kandela. Trahadónan di WEB a kita e koriente. A sera e kaya un ratu pa asina brantwer por a ehersé su trabou trankil i na òrdu. No tabatin niun persona herida.
