Notisia di polis di djárason 9 di òktober te ku djaluna 14 di òktober 2024
Detenshon pa maltrato ku arma
Djasabra 12 di òktober, alrededor di 12.30 or di mardugá, ‘meldkamer’ sentral a risibí notifikashon tokante un dama ku a dal un otro dama ku bòter na un establesimentu di hóreka na Kaya L.D. Gerharts. Personal di ambulans a trata e víktima i a hib’é hòspital pa tratamentu médiko mas avansá. Alrededor di 00.40 or di mardugá a detené un dama di inisial M.N. di 45 aña di edat pa maltrato ku un arma. E sospechoso tabata skondí den kushina di e establesimentu di hóreka. Investigashon den e kaso ta andando.
Insidente
Djabièrnè 11 di òktober, alrededor di 11.20 or di anochi, ‘meldkamer’ sentral a risibí notifikashon tokante un hòmber ku a kai for di su baiskel na Kaya P.N. Antonio Neuman i a resultá heridá. E víktima a deklará ku e nota kòrda nada mas. Personal di ambulans a trat’é i a hib’é hòspital pa tratamentu médiko.
Detenshon
Djabièrnè 11 di òktober, alrededor di 3.30 or di atardi, a detené un hòmber di inisial M.A.J.J. di 21 aña di edat na Kaya Renata pa violashon di Lei di Arma di Kandela BES, Lei di Arma BES i pa menasa. En konekshon ku e kaso aki, a tene un entrada hudisial na un kas na Kaya Papa Cornes. Investigashon den e kaso ta kontinuá.
Aksidente Kaya Platina
Djabièrnè 11 di òktober, alrededor di 1.15 or di atardi, ‘meldkamer’ sentral a risibí notifikashon tokante un aksidente na Kaya Platina. Pa motibu te ainda deskonosí, un outo a dal den kurá di un kas. Pa e motibu aki e shofùr a resultá heridá i ambulans a transport’é pa hòspital pa tratamentu médiko.
Detenshon violashon Lei di Arma di Kandela
Djaweps 10 di òktober, alrededor di 7.50 or di anochi, a bolbe detené un hòmber di inisial G.M.J. di 51 aña di edat na momentu ku el a rekobrá su libertat for di prizòn, e Instituto Hudisial Hulanda Karibense (JICN). Durante un kòntròl, a topa e sospechoso ku munishon. A detené pa violashon di Lei di Arma di Kandela BES. A konfiská e munishon i investigashon den e kaso ta kontinuá.
Ladronisia for di vehíkulo na sitio di sambuyá
Djaweps 10 di òktober a drenta keho di ladronisia i destrukshon for di un outo di hür ku tabata stashoná na un sitio di sambuyá na E.E.G. Bulevar, na altura di Red Slaves. Entre 1 or di mèrdia i 2 or di atardi, deskonosínan a destruí e bentana di e outo na banda di pasahero i a bai ku diferente artíkulo for di e vehíkulo na momentu ku e doño a bai sambuyá. Esaki tabata entre otro un tas koló hel ku tres telefòn ‘iPhone’ i un pòtmòni ku kontenido. E outo tabata na lòk. Despues di mas investigashon, algun ratu despues a haña e tas hòrtá ku e artíkulonan na Kaya Calixta. A konfiská esakinan. Ta investigando e kaso.
Detenshon pa manehá bou di influensia, violashon Lei di Opio i pa maltrato
Djaweps 10 di òktober, alrededor di 1.50 or di mardugá, a detené un hòmber di inisial A.A.P. di 26 aña di edat riba Kaya L.D. Gerharts pa manehá bou di influensia di alkohòl. E sospechoso a kore dal ku su vehíkulo den un kurá riba e kaya menshoná i a resultá heridá. Personal di ambulans a trat’é na e sitio mes. Konforme e maneho ‘botsen is blazen’, a hasi un tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. A detené i a hib’é warda di polis pa un análisis di rosea. Despues di mas investigashon a resultá ku e sospechoso no tabata disponé di un reibeweis. Durante ku tabata listra e sospechoso a hañ’é ku supstansianan narkótiko, i a konfiská esakinan. Ademas, tabatin pèrmit pa detenshon di e sospechoso relashoná ku un kaso di maltrato ku a tuma lugá riba djadumingu 8 di sèptèmber. Investigashon den e kaso ta kontinuá.
Pikòp na kandela
Djaweps 10 di òktober, alrededor di 1.35 or di mardugá, ‘meldkamer’ sentral a risibí notifikashon tokante un pikòp na kandela na Kaya Jaspe. Na yegada di e patruya, e vehíkulo tabata kompletamente na kandela. Brantwer a paga e kandela i no tabatin herido. Kousa di e kandela no ta konosí.
