Notisia di polis di djabièrnè 3 di mart te ku djaluna 6 di mart 2023
Ladronisia di skuter
Den oranan trempan di tramèrdia riba djadumingu 5 di mart, a drenta keho di ladronisia di un skuter koló pretu di marka Sym, modèl Fiddle, numerá MF-2367. E skuter tabata stashoná na Kaya Theresa F. Ilario i entre 11 or di anochi i 1:30 di mardugá deskonosínan a bai kuné. Ta investigando e kaso.
Skuter hòrtá hañá bèk
Den oranan trempan di mainta riba djadumingu 5 di mart, meldkamer sentral a risibí notifikashon ku a haña un skuter na un kas na Kaya Purunchi. Habitantenan di e kas a haña un skuter koló shinishi ku no ta di nan den nan veranda. E patruya ku a atendé e notifikashon a konkluí ku e skuter probablemente ta prosedente di ladronisia i a hiba esaki warda di polis. E kaso ta bou di investigashon.
Detenshon pa manehá bou di influensia
Riba djadumingu 5 di mart alrededor di 3.20 or di mardugá a detené un hòmber di 52 aña di edat di inisial J.C.V.H. riba Kaya Korona relashoná ku manehá bou di influensia di alkohòl. Un patruya a nota un pikòp blanku ta kore zeilu riba kaminda den e bario di Nort’i Saliña. E pikòp a hera dal den un palu di lus na kaminda. A para e shofùr pa kòntròl i a detené despues di a konstatá ku e tabata bou di influensia di alkohòl.
Shofùr bou di influensia ta kousa aksidente
Riba djasabra 4 di mart, alrededor di 12:30 or di mardugá a detené un hòmber di 61 aña di edat di inisial G.T.P. riba Kaya Haldu pa manehá bou di influensia. E sospechoso tabata enbolbí den un aksidente. El a bèk i dal den un outo ku tabata stashoná su tras. Na yegada di patruya na e sitio a konstatá ku e sospechoso tabata bou di influensia di alkohòl pa kua a detené.
Aksidente ku skuter
Alrededor di 6.30 or di atardi riba djabièrnè 3 di mart, un aksidente ku un skuter a tuma lugá riba Kaya Platina. Ambulans a transportá shofùr di e skuter pa hòspital pa tratamentu médiko.
Kandela den kas
Riba djabièrnè 3 di mart, meldkamer sentral a risibí notifikashon tokante kandela den un kas situá na Kaya Perla. Un bateria di ‘lithium’ ku tabata den e kas a pega kandela. Brantwer a paga e kandela. No tabatin herido. Sí tabatin daño material.
