Notisia di polis di djabièrnè 27 di òktober te ku djaluna 30 di òktober 2023
Destrukshon i aksidente
Riba djaluna 30 di òktober, alrededor di 1.30 or di mardugá, ‘meldkamer’ sentral a risibí notifikashon tokante un kaso di bringamentu entre dos persona na un establesimentu di hóreka situá na Hanchi Amboina. Na yegada di patruya, un di e partidonan ya a bandoná e sitio. Despues di un investigashon mas aleu a resultá ku dos hòmber tabata den diskushon ku otro i na dado momentu un di nan a bira agresivo. Pa e motibu aki algun persona a opta pa saka e hòmber agresivo pafó di e establesimentu i a lòk e porta di entrada. E hòmber ku tabata pafó a kibra bentana di e porta i a drenta paden. Aki el a kuminsá tira diferente bòter di glas den direkshon di e víktima. Despues el a bandoná e sitio. Algun ratu despues a drenta notifikashon di un aksidente na Kaya Papa Cornes. Un outo a dal den un pilá di betòn. E shofùr a resultá di ta e hòmber ku tabata enbolbí den e diskushon algun ratu promé na Hanchi Amboina. Personal di ambulans a dun’é tratamentu médiko na e sitio mes.
Aksidente ku bròmer
Alrededor di 12.30 or di mardugá riba djaluna 30 di òktober, un aksidente ku un bròmer a tuma lugá riba Kaya Korona. Pa motibu ainda deskonosí, e shofùr a kai for di e bròmer. Pa e motibu aki el a resultá heridá. Ambulans a transportá e shofùr pa hòspital pa tratamentu médiko.
Aksidente ku skuter
Riba djadumingu 29 di òktober, alrededor di 9 or di anochi, un aksidente ku un skuter a tuma lugá riba Bulevar E.E.G. Pa motibu ainda deskonosí, e shofùr a kai for di e skuter. Pa e motibu aki el a resultá levemente heridá. Ambulans a transportá e shofùr pa hòspital pa kòntròl médiko.
Aksidente
Riba djadumingu 29 di òktober, alrededor di 5.45 or di atardi, ‘meldkamer’ sentral a risibí notifikashon tokante un aksidente riba Kaminda Onima. Un outo a resultá den mondi kantu di kaminda. E shofùr a deklará ku e tabata manehando direkshon pa Rincon i na dado momentu un otro outo a hala i pas’é probablemente muchu skèrpi. Pa e motibu aki e shofùr a pèrdè kòntròl i bai dal den un pida muraya kantu di kaminda. Finalmente e outo a bai resultá den mondi. E otro outo a sigui kore bai. Personal di ambulans a atendé ku shofùr di e outo enbolbí na e sitio mes. Pa motibu ku tabatin zeta a basha riba kaminda a konsekuensia di e aksidente, brantwer a akudí na e sitio pa basha santu riba dje.
Detenshon pa maltrato ku arma
Riba djadumingu 29 di òktober, alrededor di 12 or di mèrdia, a detené un hòmber di inisial E.M.E.N. di 54 aña di edat pa maltrato i maltrato ku un arma. E sospechoso a maltratá un hòmber ku un pida palu riba Kaya J.N.E. Craane. Investigashon den e kaso ta kontinuá.
Detenshon pa Lei di Opio BES
Alrededor di 3.40 or di mardugá riba djadumingu 29 di òktober, a detené dos hòmber na un establesimentu di hóreka situá na Kaminda di Lac. E agentenan ku tabata na e sitio pa un asistensia, a sinti un holó fuerte di probablemente supstansianan narkótiko. E holó tabata prosedente for di un outo stashoná na e sitio. E outo tabatin tres okupante den dje. E agentenan a pasa over mesora pa un kòntròl den kuadro Lei di Opio BES. Durante e kòntròl riba e sospechosonan i den e vehíkulo, a haña i konfiská entre otro dos mashin pa pisa, diferente saku ku probablemente supstansianan narkótiko i un kantidat di sèn kèsh. A detené e hòmber di inisial C.R.F. di 26 aña di edat i e hòmber di inisial J.N.S.J. di 21 aña di edat pa violashon di Lei di Opio BES.
Kòntròl di tráfiko
Den oranan trempan di anochi riba djabièrnè 27 di òktober, a tene un kòntròl di tráfiko na Kaya Industria. Durante di e kòntròl aki a kontrolá si shofùrnan tin un reibeweis bálido i dokumentonan di seguro bálido.
Aki a para i kontrolá un total di 13 shofùr, pa kua a duna dos but. A duna un but pa manehá sin reibeweis bálido i un but pa manehá sin dokumentonan di seguro bálido.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
Detenshon pa manehá bou di influensia
Riba djasabra 28 di òktober, alrededor di 3.45 or di mardugá a detené un hòmber di inisial F.G.J.J. di 23 aña di edat riba Kaya Libertador Simon Bolivar. Un patruya a para e vehíkulo ku e sospechoso tabata manehá despues di a risibí notifikashon ku el a dal den un outo riba Kaya Prinsès Marie i a kore bai. Na momentu ku e agentenan a aserká e shofùr, e no por a mustra un reibeweis bálido. A konstatá ku e tabatin wowo kòrá, e tabata papia ku lenga pisá i e no por a para riba su pianan. Debí ku e tabata bou di influensia di alkohòl, e no tabata den kondishon pa hasi un tèst di supla ni un tèst di rosea.
Riba djaweps 26 di òktober, alrededor di 7.30 or di anochi, a detené un hòmber di inisial F.A.C. di 73 aña di edat pa manehá bou di influensia di alkohòl. E sospechoso a dal ku su vehíkulo tras di un outo riba Kaya Carlos A. Nicolaas i a bandoná e sitio na pia. Polis a topa kuné na un kas den serkania i a konstatá ku e tabatin wowo kòrá, e tabata papia ku lenga pisá, e no por a para riba su pianan i un holó fuerte di alkohòl tabata sali for di su aliento. Pa e motibu aki a hasi un tèst di supla kuné i a resultá ku e tabata bou di influensia di alkohòl. A detené i bai kuné warda di polis pa un análisis di rosea. En konekshon ku resultado di esaki a konfiská su reibeweis.
Riba djaweps 26 di òktober, alrededor di 3.15 or di mardugá a detené un hòmber di inisial J.H.A.L. di 21 aña di edat pa manehá bou di influensia di alkohòl. E sospechoso a bèk su vehíkulo i dal den muraya di un edifisio na Kaya C.E.B. Hellmund. Despues di esaki, el a trata na kore bai. Un kolaboradó di kuerpo ku a tuma nota di loke a sosodé, a aserká e sospechoso pa e no bandoná e sitio te na momento ku polis yega na e sitio. Na yegada di patruya a konstatá ku un holó fuerte di alkohòl tabata sali for di aliento di e sospechoso. Pa e motibu aki a hasi un tèst di supla kuné i a resultá ku e tabata bou di influensia di alkohòl. A detené i bai kuné warda di polis pa un análisis di rosea. En konekshon ku resultado di esaki a konfiská su reibeweis.