Detenshon enkubrimentu
Den oranan di atardi riba djaweps 27 di yüli a detené un hòmber di inisial O.P.F. di 67 aña di edat na Kaminda Nieuw Amsterdam en konekshon ku enkubrimentu. E sospechoso a kumpra un skuter prosedente di ladronisia. Investigashon den e kaso ta andando.
Detenshon pa violashon Lei di Opio BES
Riba djaweps 27 di yüli alrededor di 1 or di mardugá a detené un hòmber di inisial R.E.E.B. di 40 aña di edat pa violashon di Lei di Opio BES. E sospechoso tabata den un outo ku tabata stashoná di forma sospechoso na un parada di bùs (bushalte) den Amboina. Un patruya ku a pasa a tene un kòntròl i a topa e sospechoso ku un yerba paresido na supstansia narkótiko. Despues di kòntròl mas aleu den e outo, a bin topa ku mas yerba i puiru paresido na supstansia narkótiko. Pa e motibu aki a detené e sospechoso. A konfiská e produktonan ku a topa kuné i e outo pa mas investigashon.
Aksidente
Alrededor di 3 or di atardi riba djárason 26 di yüli, un aksidente entre un outo i un skuter a tuma lugá riba Kaya Monseigneur Nieuwindt. E outo kier a bira na su man robes pa drenta Kaya Piquiri na e momentu ei diripiente un skuter kier a pas’é. E skuter a dal den e spil i dilanti di e outo na banda robes i despues di kual e shofùr a kai. Personal di ambulans a hasi un chekeo médiko na e sitio mes ku e shofùr di e skuter i su pasahero i nan no mester a bai hòspital.
Algun ratu promé, alrededor di 2.15 or di atardi, un aksidente a tuma lugá na e krusada di Kaya Gramèl i Kaya Sábalo. Pa motibunan deskonosí, dos outo a dal den otro. Ambulans a transportá shofùr di un di e outonan pa hòspital pa tratamentu médiko.
