Detenshon pa maltrato
Riba djaweps 24 di mart, alrededor di 11.15 or di anochi a detené un hòmber di inisial B.J.F. di 53 aña di edat na Kaya Patricia en konekshon ku maltrato. Algu mas trempan e sospechoso maltratá un hòmber na un kas situá na Kaya Dr. Grigorio Hernandez.
Ladronisia na sitio di sambuyá
Riba djárason 23 di mart a drenta keho di ladronisia for di un outo ku tabata stashoná na e sitio di sambuyá ‘Jeff Davis Memorial’. Entre 3.45 or i 5 or di atardi, miéntras e shofùr i e otro okupante dje outo tabata sambuyá, deskonosínan a forsa dos bentana i a bai ku vários artíkulo. Nan a bai ku entre otro un iPhone 12 PRO i un pòtmòni ku diferente tarheta i sèn kèsh komo kontenido. Ta investigando e kaso.
Outo ta dal den muraya
Alrededor di 4 or di atardi riba djárason 23 di mart, sentral di polis a risibí notifikashon ku un outo a dal den un muraya. Despues di investigashon a resultá ku e shofùr a hinka e outo, ku tabata stashoná dilanti un muraya, den ‘drive’ na lugá di den ‘reverse’ i bai dal den e muraya. Personal di ambulans a chek e shofùr na e sitio mes i e no mester a bai hospital.
Kiebro den negoshi di hóreka
Entre 4 or i 6.30 or di mardugá, riba djárason 23 di mart, deskonosínan a kibra drenta den un establesimentu di hóreka situá Kaya L.D. Gerharts. E malechornan a drenta e patio di e lugá dor di e dak i a forsa vários porta di paden pa a drenta den diferente espasio. Nan a bai ku entre otro 3 iPad i sèn kèsh. E kaso ta bou di investigashon.