Boneiro: Noticia di Polis 5 te cu 10 di februari 2021

Boneiro: Notisia di polis di djaluna 5 di febrüari te ku djárason 10 di febrüari 2021

Morto natural
Riba djamars 9 di febrüari, alrededor i 5.53 or di atardi, sentral di polis a risibí notifikashon ku a haña un hòmber ku no tabata duna señal di bida den un kas situá na Kaya C.E.B. Hellmund. Despues di investigashon di e dòkter di ‘schouw’ a resultá ku ta trata di un morto natural. Ta trata di e hòmber di inisial M.A.P., nase riba 27 di ougùstùs 1950.

Pikòp ta dal den ‘golfcart’
Den oranan di atardi riba djamars 9 di febrüari un aksidente entre un pikòp i un ‘golfcart’ a tuma lugá riba Kaminda Djabou. E pikòp tabata koriendo riba Kaminda Djabou bayendo den direkshon di Kaya Neerlandia. E ‘golfcart’ diripiente a krusa, saliendo for di un kaya den banda di Kaminda Djabou. Dor di esaki e pikop a wanta brek i a purba wela e ‘golfcart’ pero a dal den dje tòg. Shofùr di e ‘golfcart’ tabata herida i ambulans a transporte pa hospital pa tratamentu médiko.

Destrukshon na skol básiko
Riba djamars 9 di febrüari a drenta keho di destrukshon na un skol básiko situá na Hanchi Amboina. Entre djabièrnè 5 di febrüari i djamars 9 di febrüari deskonosínan a kibra un bentana. Anteriormente deskonosínan a bai ku un galiña i algun pampuna tambe for di e skol. Esaki ta bira e di tres insidente. Ta investigando e kaso.

Kòntròl di tráfiko mas frekuente
Den e periodo tras di lomba a duna mas i mas shofùr but dor ku nan tabata kore sin dokumentunan bálido di seguro, sin reibeweis bálido i sin plachi di number (bálido). Tambe pa manehá sin faha di seguridat, uzo di telefòn ora ta manehá i pa kore riba skuter sin hèlm bistí hopi biaha a duna but.

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.

REKOMPENSA DI 5000 USD PA PEGAMENTU DI KANDELA NA CARTECH, djaweps 20 di febrüari 2020
E investigashon den kuadro di e kandela ku a tuma lugá riba djaweps 20 di febrüari na e kompania Cartech, situá na Kaya Industria 1a, ta den ful suin (swing). Polis a papia ku hopi hende i a hasi investigashon di pista intensivo. E tim di reshèrshi ke drenta den kontakto ku testigunan ku por tin mas informashon òf ku ku sa ken ta e malechor(nan).

Ministerio Públiko tin un rekompensa di $5000 pa e tep di oro. Bo tin informashon ku por kontribuí na resolvé e pegamentu di kandela aki òf posiblemente bo sa ken ta e malechor(nan)? Tuma kontakto e ora ei ku e e tim di reshèrshi di KPCN na number di telefòn 717 8614. Por hasi esaki kompletamente anónimo tambe na 717 7251.

Comments

comments