Notisia di polis di djabièrnè 12 di yüni te ku djaluna 15 di yüni 2024
Ladronisia for di kònteiner
Riba djaluna 15 di yüli a drenta keho di ladronisia for di un kònteiner di konstrukshon situá na Sabadeco Crown. Entre djadumingu 14 di yüli i djaluna 15 di yüli, deskonosínan a duna nan mes akseso na e kònteiner i a bai ku vários hèrmènt di marka Milwaukee, Dewalt, Makita i Bostitch. Ta investigando e kaso.
Detenshonnan pa manehá bou di influensia
Den oranan di mardugá riba djaluna 15 di yüli a detené un hòmber di inisial W.A.E. di 58 aña di edat riba Kaya Andres A. Emerenciana pa manehá bou di influensia di alkohòl. E sospechoso tabata enbolbí den un aksidente ku a resultá den un interkambio di palabra entre e shofùrnan. Despues di investigashon mas aleu, un di e shofùrnan (e sospechoso) no por a mustra un reibeweis bálido i e tabata mustra diferente karakterístika di un persona ku ta bou di influensia di alkohòl. Despues di a hasi un análisis di rosea, el a haña un prohibishon di manehá di 10 ora.
Riba djasabra 13 di yüli, alrededor di 1.45 or di mardugá, a detené un hòmber di inisial G.G.S. di 38 aña di edat na Hanchi Amboina pa manehá bou di influensia di alkohòl. E sospechoso tabata enbolbí den un aksidente. Konforme e maneho ‘botsen is blazen’ a hasi un tèst di supla ku e shofùr i a resultá ku el a konsumí mas alkohòl ku ta permití ora ta manehá un vehíkulo. A detené i hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Hinkamentu
Den oranan di atardi riba djasabra 13 di yüli un hinkamentu a tuma lugá pafó di un establesimentu di hóreka na Kaya Karaña. Despues di un interkambio di palabra tokante un telefòn, a hinka un hòmber. E sospechoso a bandoná e sitio inmediatamente. Ambulans a transportá e víktima pa hòspital pa tratamentu médiko. Despues di un investigashon kòrtiku, a detené un hòmber di inisial G.M.J. di 50 aña di edat pa maltrato ku un arma i intento di asesinato.
Detenshon pa destrukshon
Riba djasabra 13 di yüli, alrededor di 3.05 or di mardugá, a detené un hòmber di inisial C.L.B.S. di 26 aña di edat riba Kaya Nikiboko Sùit pa destrukshon. E sospechoso a destruí un spil di ambulans riba Kaya Soeur Bartola i despues a kore bai. Ta investigando e kaso.
Tiramentu ku arma di kandela
Den oranan di mardugá riba djasabra 13 di yüli, a lòs tirunan ku un arma di kandela for di un outo ku a pasa na momentu ku un hóben tabata para pafó di un outo dilanti di su kas. E outo sospechoso tabata bini for di nort riba Kaminda Djabou i e hóben tabata pará na un outo dilanti di un kas na e krusada di Kaminda Djabou i Kaya Karpitan. No tabatin herido.
Den oranan di atardi riba djabièrnè 12 di yüli, ‘meldkamer’ sentral a risibí notifikashon tokante un kaso di tiramentu. Deskonosínan a pasa lòs tirunan riba un kas na Kaminda Gurubu miéntras tabatin hende den e kas. No tabatin herido.
KPCN ta pidi kualkier persona ku por a mira algu òf ku tin informashon tokante e sospechoso(nan) òf e insidente, pa tuma kontakto ku polis na 715 8000, 717 8000 òf via e liña di tep anónimo 9310.
