Kralendijk – Riba djarason 16 di òktober durante e konferensia ‘From the Poles to the Tropics, OCT’s Blue Landscape’ ku e Asosashon di Paisnan i Teritorionan Ultramar di Union Oropeo (OCTA) a organisá na Brussel – Bélgika, gezaghebber Edison Rijna a presentá e konsepto di Blue Destination na un públiko internashonal. El a haña hopi elogio pa esei.
E siman aki gezaghebber Rijna i diputado Elvis Tjin Asjoe riba invitashon di OCTA a partisipá na e asina yamá ‘Oceans Conference – Konferensia tokante Oséanonan’ den e kapital belgikano. Boneiru, méskos ku su islanan ruman Kòrsou, Aruba, Sint Eustatius i Saba ku tambe tabata representá na e konferensia, ta miembro di OCTA, e organisashon di paisnan i teritorionan ultramar ku ta un anterior kolonia di paisnan ku ta miembro di Union Oropeo.
Boneiru tin e ambishon pa bira e promé Blue Destination na mundu, un komunidat sostenibel kaminda prosperidat ekonómiko no ta e meta, pero un medio pa alsa bienestar di e poblashon i mantené esaki pa generashonnan di futuro. Aktua na un manera responsabel ku medio ambiente i rekursonan natural ta un di e partinan den esaki.
Gezaghebber Rijna a konta su oudiensia ku Boneiru ya kaba ta riba e bon kaminda, pa motibu ku for di hopi tempu pasá nos a komprendé ku nos mester kuida ambiente di biba riba nos isla. Por ehèmpel for di 1979 ya kaba a deklará e refnan di koral úniko rònt di nos isla komo parke nashonal protehá. Entretantu nos ekonomia ta drai pa 40% riba energia solar i energia di bientu, e Parke di Alga a kuminsá haña forma i nos ta preparando un prohibishon di plèstik desechabel. Gezaghebber Edison Rijna a enfatisá e importansia di koperashon entre gobièrnu, organisashonnan no-gubernamental i mundu empresarial. Tambe el a mustra ku e konsepto di Blue Destination, manera Boneiru a desaroyá esaki, ta konektá perfektamente ku e 17 ophetivonan di desaroyo sostenibel – e asina yamá ‘sustainable development goals’ – ku Nashonnan Uní a stipulá i di kua por ehèmpel kombatimentu di pobresa tambe ta forma parti.
Despues di e presentashon di tur banda e delegashon boneriano a haña kòmplimènt pa e ròl ehemplar ku Boneiru ta hunga, pa motibu ku komo isla chikitu Boneiru a tuma inisiativa pa duna un kontribushon pa tene e mundu aki habitabel. Hopi di e presentenan a bisa bon kla ku nan ta sinti nesesidat pa haña mas informashon tokante e aserkamentu boneriano. Di gezaghebber Rijna i diputado Tjin Asjoe nan no a haña solamente splikashon, pero tambe un invitashon pa bishitá Boneiru i mira ku nan propio wowo kon nos ta trahando pa logra trese progreso ekonómiko i konservashon di naturalesa i kultura den ekilibrio ku otro.