A entrega varios decreto gubernamental durante un recepcion special pa algun trahado cu ya caba a haci hopi aña trahando y brindando nan servicio heroico na nos comunidad den nan funcion di Bombero. Na e ocasion aki, Minister di Husticia, mr. drs. Arthur Dowers tabata presente y el a elogia e trabou cu Brandweer ta haci y a bisa cu durante e añanan aki, Brandweer a bringa basta bataya pa haya e reconocimento cu nan merece.
“Mi mester bisa cu nos ta logrando, nos no a logra completamente ainda, pero nos ta logrando pa e reconocimento aki bin y ta nifica cu mas medionan financiero lo bin disponibel pa percura pa nos departamento por funciona di e forma mas optimal posibel”, asina e mandatario a subraya. El a felicita e Bomberonan pa e trabao cu nan a haci e ultimo añanan. A gradici e bon trabao haci y banda di esaki a gradici nan famia tambe pa e sosten.
E reconocimento y aprecio di parti di Gobierno y di parti di e leiding di Brandweer t’ey. Tabatin critica cu algun cosnan ta tarda, pero tin biaha como Ministerio di Husticia no tur cos ta den nan man. Tin aspectonan cu ta cay bao di otro departamentonan. “Pero di nos banda nos a haci tur esfuerso den e periodo nos dilanti pa percura pa e rechtspositie regeling cambia y boso por haya e reconocimento cu boso merece”, Minister Dowers a expresa.
Durante e recepcion, a reconoce diferente persona pa nan añanan di servicio. Tin personanan cu a cumpli 40 aña, tambe 35 y 25 aña di servicio. “E trabao aki ta un trabao cu ta exigi hopi di bo fisicamente. Den e ultimo añanan nos a inverti hopi den Brandweer den e aspectonan material. Pero mi a duna awe nochi reconocimento na e trahadonan pa e echo cu nan, na un forma ehemplar a cumpli cu nan trabao e ultimo 40, 35 y 25 aña”, el a agrega.
Bomberonan cu a ricibi nan Decreto Gubernamental pa 40 aña di servicio tabata Alberto M. Laveist mientras cu pa 35 aña di servicio a haya decreto Roland K. van Cleef, David Donata, Juan de Dios Fingal, Emilio B.F. Kock, Michael E. Ras y Eugenio S. Servud. Tambe tabatin un grupo grandi di Bomberonan cu a cumpli no menos di 25 aña di trabou. Ta trata aki di Carlos A.F. Maduro, Marlon G. Hidalgo, Eerwin M. Emerencia, Angelberto V. Donato, Mario E. Giel, Silvio E. Croes, Rudolf V. Calmes, Rolando R. Vries, Ellon P. Arends, Anthony F. Trimon, Terence C. Agumbero, Enrique R. Tromp, Charles A. Halley, Pedro X. Werleman, Anthony Erasmus, Damasco I. Maduro, Gino R.J.V. Tromp, Rudy M. Ras, Haime V. Tromp, Michel F. Werleman y Benigno R. Geerman.
Loke a accentua ta e importancia di Cuerpo di Bombero pa loke ta siguridad di nos hendenan pa actua na momento cu hende bira den peliger. Pero tambe Cuerpo di Bombero tin un aspecto hopi importante pa loke ta e aspecto preventivo den nos comunidad pa loke ta nos economia pasobra nan mester ta semper presente na aeropuerto, pa asina garantisa cu aeropuerto por funciona, e Minister a subraya.
Finalmente, el a indica cu tambe ta di importancia e cooperacion entre tur e departamentonan pasobra mester garantisa cu Brandweer por yega na e medionan optimal, sigurando nan funcionamento a largo plaso, dun’e e reconocimento y e training cu e trahadonan tambe tin mester di dje.