Un di e tres competencianan organiza pa Aruba Art Fair rumbo pa e fecha final 16, 17 y 18 di September ta e competencia di Aruba Aloe.
Un Sistema pa lanta e entusiasmo pa Arte y Cultura den comunidad pero tambe pa trese e importancia di duna Danki na un instancia cu a sa di duna masha hopi aporte na nos Isla y nos hendenan.
Un total di 10 artista sea nan ta traha individualmente of den grupo a haya un escultura traha pa Edmond Teejuhut y Frank Croes p’asina por crea arte, cambia esaki segun nan vision di loke ta e significacion di Aruba su Cultura y duna realse na e 125 aña di exsistencia di Aruba Aloe.
Aruba conoce masha hopi artista den e ramo di Mozaik, algo cu ta haya mas y mas acogida segun su popularidad ta bay aumentando. Un di e gruponan cu ta representa esaki ta Shoco Garden cu ta un jardin specialisa den duna personanan cu un dificultad of otro, of personanan cu ta busca paz un lugar pa yega na e calmo spiritual atrabes di diferente disciplina di Arte. Esaki funda pa sra. Merveline Geerman un sobreviviente di cancer. Den e jardin aki grupo di persona ta bin hunto entre otro pa traha riba Mozaik y hunto yega na un obra final a base di teamwork, vision y complementisacion.
“Na momento cu mi a tende di e competencia, mi a mira rond di mi y tur a bisami, Si ban pe. Hunto nos a dialoga y pensa con lo ta e miho manera pa trece nos sentimentonan dilanti. Algo cu tin di haber cu nos cultura. Y di biaha nos a conclui “KALBAS” Merveline ta conta.
15 curason a uni pa traha e piesa di Calbas hinca metaculosamente den otro pa cada un fundi manera rumanan cu ta sostene otro den un bataya. Colornan cu ta forma un fluho, na unda no tin principio ni final. Delicado y precioso.
Calbas, usa como purgashi hunto cu azeta di Carpata of di azeta di Amandel.
Na unda bo ta mula un copi di simia di Calbas di mondi seco, bruha e puiru den un copi di lechi of di awa y ta core cu tur bichi den bo curpa. Pero tambe pa pone dilanti bo cas y core cu tur fucu. Calbas pa pone den koeki dushi y pa halsa aromanan den bo cas. Den arte usa pa traha color.
Aruba Art Fair ta orguyoso di e grupo aki pa nan bunita obra di Arte, pero tambe pa nan preserverancia pa nan amor pa Aruba, nan amor pa arte. Nan lo ta parti di e embeyicimento di San Nicolas, na unda ya caba ta trahando riba obranan mahestuoso cu lo cubri e bankinan den e cayanan di San Nicolas den colaboracion cu Stichting Arte Mosa.
Nan ta e grupo tambe cu lo ta parti di e workshop cu lo wordo duna na YMCA siñando e hobennan e poder di laga bay nan miedo, indiferencia y nan sentimento di individualismo atrabes di Arte di Mozaik y lo asisti Isidora Paz di Chile den su intervencion. Sigui Mozaik di cerca via www.arubartfair.com.