Durante e ultimo siman, Cruz Cora Aruba a prepara pa hiba asistencia humanitario den forma di material di auxilio, awa, shelterboxes, lona pa dak y tent Haiti den un operacion hunto cu Ministerio di Defensa di Reino. Despues bestuur di Cruz Cora Aruba y Hulanda a yega na un acuerdo, cu lo tambe manda dos voluntario di Aruba riba e mision aki. E boluntarionan Marla Thiel y Luigi Petrocthi, tur dos lider di nan zona na Aruba y cu ta forma parti di e Disaster Team di Cruz Cora Aruba a subi Z.M. Holland hunto cu marine rumbo pa Haiti.
Nan trabou lo encera duna ayudo humanitario y distribui tur e material cu a manda, haci Damage Assessment cu ta un training y pone den practica loke nan ta siña. E operacion aki ta duna nan hopi experticio si un dia nan mester aplica esaki na Aruba mes. Tambe nan lo haci un analisis pa Nederlandse Rode Kruis pa asina evalua unda nan por duna ayudo structural den region. Marla y Luigi lo busca contacto cu e Cruz Cora local y tambe Federacion Internacional di Cruz Cora cu na momento aki tin 35 persona presente na Haiti.
Mision di Cruz Cora Aruba ta pa yuda alivia sufrimento humano y como cu Haiti ta e isla mas vulnerabel den region, ta mas cu claro cu ta duna un man unda cu por. Ainda Haiti ta recuperando di un temblor y varios horcan, cholera, dengue y zika. Despues di e temblor, Aruba a recauda 1.3 miyon florin cu a wordo usa pa construi dos scol, a combati cholera e tempo ey, a manda dos team di ayudo. Tur fondo a wordo inverti den ayudo humanitario.
Ta desea Marla y Luigi hopi forsa y cu nan por yuda mas cu nan por. E experiencia aki, nan lo comparti cu coleganan y lo mantene e nivel di e Disaster Team di Cruz Cora Aruba riba un nivel halto. Yudando di e manera aki den nos region ta e manera cu nan por pone tur nan training den practica, cu ta un bentaha grandi pa Aruba si un dia mester aplica esaki riba nos mesun tera. Nos mester ta gradici cu naturalesa a un biaha mas a salba Aruba di un calamidad di tal magnitud.