Agnus Dei, qui tollis peccata mundi, miserere nobis. Lamchi di Dios cu ta kita pica di mundo (Huan 1:29), tene piedad di nos.
Abraham a wak rond y e a mira un chubato carne pega cu su cachonan den rama di palo. E a coge e chubato carne y a ofrece como sacrificio di candela na luga di su yiu. (Genesis 22:13). E simbolo di sacrificio ta un lamchi. Hesu Cristo a muri na Santa Crus como sacrificio pa nos pikanan. E ta e Lamchi di Pasco. Nan lo bringa contra e Lamchi (Revelacion 17:14). E Agnus Dei ta wordo representa como un lamchi cu un halo, un banner y un crus, simbolo di Cristo.
Rev. Daniel Szpila a bini cu e bunita iniciativa, cu ya ta un tradicion na Parokia di Birgen di Fatima na Dakota, pa bende e bolo lamchi di Pasco tambe na Parokia Santa Anna na Noord. Asina e parokianonan di Noord tambe por celebra Pasco di Resureccion na un moda simbolico cu e Lamchi di Pasco den seno di nan famia. Na Noord e bolo di lamchi di Pasco ta wordo bendiciona riba Diahuebs Santo despues di e misa di 7or di anochi.
Durante tur e dianan aki prome cu Diahuebs Santo tin oportunidad pa cumpra un ticket na balor di Afl. 10,00 na Pastorie di Parokia Santa Anna, mainta entre 9or y 10or y atardi entre 5or y 6or. Tambe por cumpra ticket despues di SS di Misa den e weekend di Diadomingo di Rama. Cumpra un bolo bendiciona pa e famia. Y pakiko no? Regala un famia o un amigo tambe un bolo bendiciona.
Diahuebs anochi despues di bendicionamento di e bolonan y diasabra mainta for di 8.30 por pasa busca e bolo a cambio di e ticket den Centro Apostolico Santa Anna.
Siman Santo ta un periodo pa refleha riba e sufrimento, morto y resureccion di Hesus. Kende a muri y a resusita pa pordon di nos pikanan y nos salbacion.
Pasa un Pasco di Resureccion bendiciona.
Agnus Dei, qui tollis peccata mundi, dona nobis pacem.
Lamchi di Dios cu ta kita pica di mundo, duna nos pas.