E cas di bowling na Aruba, esta Eagle Bowling Center, lo bay ta yen di hoben dia 27 di januari proximo ora cu e federacion di bowling, ARBAS lo organisa un torneo pa tur hoben cu kier hunga y practica e deporte. Mas cu claro e celebracion lo ta en conexion cu e Dia di Betico 2017. Lo por competi den e categorianan pee-wee 6 – 11 aña y Sub 15(12-15). Premionan lo bay tin pa 1, 2 y 3 lugar den cada categoria femenino y masculino. E competencia lo bay ta tres wega regular mientras e pin total lo determina e ganador. Mester bisa si cu por tuma un maximo di 56 mucha den e inscripcion
E aña 2016, tabata un sublime pa e deporte di bowling unda Thashaina Seraus ta sobresali cu su scol na Merca ganando varios premio individual y den ekipo. Es mas Thashaina ta logra un di 10 luga den e competencia individual den Panamericano de Mayores na Cali, Colombia, mientras hunto cu Kamilah Dammers nan a logra medaya di Plata den e Panamericano di Mayores de Boliche y un di 4 lugar den Trios cu Jeadine Luidens y Kamilah Dammers. Aña pasa na December un delegacion hoben di Aruba a logra varios premio den e torneo renombra na Puerto Rico, esta Caribeño Paradise Kids Jose Luis “Chegui” Carde.
Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo enconexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.