Bogotá Chamber Orchestra (BCO), ta un proyecto realisa pa musiconan hoben. E ta wordo lidera pa graduaduado y studiantenan di Conservatorio di Universidad Nacional de Colombia.
BCO ta un orkesta cu a wordo crea pa sorprende. Pa cuminsa, e nomber Ingles pa un orkesta di hobennan Colombiano ta sorprendente. Pero e sorpresa mas grandi naturalmente ta e hecho cu e orkesta semper a toca sin un director. E filosofia pa deshaci di e director ta exigi cu e integrantenan mester ta na un nivel tecnico di calidad halto, mester ta interpretativo y mester tin sentimentonan humano pa por acerca e repertorio sinfonica. Esaki ta forsa e integrantenan mantene un actividad constante di musica di camara como fundeshi di di nan gol artistico.
Pakico e filosofia aki? Nan ta opina cu musica di un orkesta ta bira djis un ehecucion, faltando e aporte artistico y rikesa personal di musica di camara cu tur su variedadnan cautivador. BCO tin varios aña ta sigui nan filosofia exitosamente y nan ta prepara pa mustra e publico di Aruba cu no ta un mito cu nan ta actua sin director.
E programa di Bogotá Chamber Orchestra dia 23 di Juli na Cas di Cultura ta consisti di obranan Ruso di Anton Arensky y P.I. Tchaikovsky. Den e prome parti, BCO lo presenta di e compositor Arensky “Variacionnan di un Tema di Tchaikovsky Op. 35a”. Despues di pauze nan lo toca “Serenata pa Cuerdenan den C mayor, Op. 68” cu ta inspiracion di Tchaikovsky.
Entre e dos actuacionnan di BCO, e violinista Ruso Dmitri Berlinsky y e pianista Venezolano Edith Peña como duo lo toca dos obra Ruso, tur dos di Tchaikovski. Berlinsky, un musico di fama mundial a impacta e publico Arubiano e ultimo dos añanan cu su dominio completo riba su fio.
E popular pianista Venezolano Edith Peña a encanta e publico presente aña pasa riba Freewinds y den Cas di Cultura cu su maestria y su carisma. Recientemente Srta Peña a duna un concierto di tres piano na Rusia hunto cu un pianista Ruso y un Frances. Srta. Peña ta e prome musico Latino Americano pa wordo nombra pa un Grammy Award den musica clasico. Nos ta recomenda bo pa bin experencia e musica Ruso toca pa Bogotá Chamber Orchestra y interpreta tambe pa e duo Dmitri Berlinsky y Edith Peña. E integrantenan ta spera cu e colonia Colombiano na Aruba lo bin apoya nan na e concierto. E concierto ta cuminsa 6or di atardi na Cas di Cultura. Entrada ta GRATIS.
Skirbi pa: Clyde Harms