Asina cu un compania tuma un trahado den servicio, ta obligatorio pa e wordo inscribi na SvB, ariba e prome dia cu e ta cuminsa traha. E ley a wordo introduci, y a duna un aña di gracia. Pero awo ta cla pa sigui cu e controlnan y haci e ahustacion necesario pa e doño di trabao y pa e trahado. Sra. Cherryldine Berkley ta splica mas ariba esaki.
Na Aruba, tur trahado den servicio mester ta inscribi na SVB y e trahado tin derecho di exigi su doño di trabao pa wordo inscribi. Pa ley, tur trahado na aruba, mester ta inscribi na SVB, pa sigura contra seguro di malesa of accidente. Pero den caso cu e doño di trabao no ta duna e trahado e oportunidad di inscribi na SVB, e doño di trabao ta priva e trahado di tin su proteccion, cual e seguro nan aki ta ofrece, ora cu e haya accident na pia di trabao of e bira malo.
Pero ademas cu e doño di trabao ta comete fraude, door cu e no ta paga e primanan aki, pero ademas di fraude, e doño di trabao ta haya un boet administrativo. E boetnan aki ta duna SVB mas autoridad pa enfrenta problemanan. Tur doño di trabao tin obligacion di und ainformacion completo y corecto. Tambe di cumpli cu inscripcion di su trahado na trabao. Pa e incumplimento aki, e boet lo por suma te na mey miyon florin (e maximo). Mester pone e limite un caminda.
Ultimo temponan tin hopi control tumando luga, Sra. Berkley a sigui splica, cu e boetebeleid a drenta na vigor na 2017. Y awo ta october 2018, SVB a haci varios investigacion caba. Tin algun doño di trabao a wordo informa caba cu lo tin boet ta biniendo. Tin di nan ta wardando pa concretisa di cuanto e boet ta bay bira. Ta importante pa conta esaki, den caso di cu SVB comete un infraccion, SVB tin diferente liña di guia ora di duna boet administrativo y di con halto esaki por bira. Ora di duna boet, ta actua ariba e principio di proporcionalidad (evenredigheid beginsel). Esaki kiermen cu ta determina e boet na nivel di e gravedad di infraccion, cu probablidad di doño di trabao y circumstancia den caso specifico. Y tin tres categoria. E ora ta bay wak categoria A: Formulario di Inscripcion no yena completo of no ta yena di forma corecto. Tin un grupo cu ta cay bou categoria B: No a inscribi e trahado nan tempo. Y tin e grupo cu no a inscribi e trahado nunca.
Tur informacion ta ariba e portal di SVB. E ta ariba e link Boetebeleid SVB april 2017. Y tambe, si no tin informacion, por manda un mail via e website y aplica pa e documento. Ta importante pa tur doño di trabao ta consciente cu e ta un ley y obligacion cu tur trahado mester ta inscribi, tur tipo di trahado, es decir tambe esun cu ta traha parti-time. Te asina leu, Sra. Cherryldine Berkley cu e relato.
