Bodyboarder Joshua Kelly lo representa Aruba den e campeonato internacional Viana-Pro APB Tour na Viana Do Castelo, Portugal

Despues cu aña pasa nos atletanan elite di bodyboard a competi den e dos diferente competencia organisa pa e asociacion mundial di bodyboard profesional, A.P.B. na e pais di Portugal, e aña aki un bez mas Aruba Bodyboard Association a opta pa manda un atleta di Aruba pa dicho pais pero e biaha aki pa e Viana Pro e dianan 21 – 25 di september na Viana Do Castelo. Aruba Bodyboard Association a evalua e sistema di ranking despues di 4 competencia den henter e aña y asina yega na e conclusion pa eligi e hoben Joshua Kelly pa representa Aruba den competencia mundial cu lo conta cu e mihonan di mundo den bodyboard masculino.
Aña pasa e bodyboarder nan Jeremy Loefstok, Anthony Wever, Jayfrem Croes y e propio Joshua Kelly a bataya fuerte contra di e top mundial den e deporte acuatico den e Sintra Pro 2015 y Nazare Pro 2015 ambos organisa pa e Association of Professional Bodyboarders. E biaha aki ta Joshua Kelly so lo competi y purba saca cara di Aruba. Pa Joshua esaki lo ta un otro experiencia mas mirando cu aunke e la competi anja pasa, e lo ta mucho mas miho prepara pa e competencia di e aña aki. Aña pasa Joshua Kelly a keda na di 49 luga den e Men’s Open Division. E deporte extremo bodyboard a bira uno hopi popular na Aruba, unda particularmente nos hobennan ta practica esaki na nos costanan Norte, esakinan Druif, Wariruri, Dos Playa, Anker. Aruba Bodyboard Association ta organisa su competencianan a base regular y ta atende competencianan internacional.
Lotto, e Loteria di Aruba pa medio di Comision di Subsidio ta contento di por subsidia e hoben Joshua Kelly pa e Viana-Pro APB Tour na Viana Do Castelo, Portugal.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.

Comments

comments