E economia Aleman, considera como esun di mas grandi di Europa, ta enfrenta persistente problema di fabricacion. E produccion industrial di e pais a sufri un caida na november, cu un caida di 0,7%, compara cu october, Bloomberg a informa.
Di acuerdo cu e agencia, ta trata di e di seis caida consecutivo, cu ta tuma luga memey di e lucha di e productornan p’e costo di energia, e indice halto di interes y un disminucion di e demanda, specialmente na China.
“Alemania probablemente a caba 2023 cu su prome recesion desde e pandemia, ya cu e analistanan ta calcula cu e datonan lo revela un di dos contraccion consecutivo di e produccion den e di cuater trimester,” e articulo ta señala.
Den e contexto aki, e economista Martin Ademmer a indica cu “e datonan decepcionante di produccion di november y e reciente deterioro di e expectativanan empresarial ta mustra na un comienso di aña yena di obstaculo p’e industria.”
“Nos ta mantene nos vision a base di un aumento leve di e GDP den e prome trimester di 2024, impulsa pa un mayor dinamica den e sector di servicio. Sinembargo ta existi un riesgo substancial cu un debilidad mas pronuncia di e industria ta lastra e economia un biaha mas na un caida den e prome trimester di 2024,” Ademmer a sostene.
Di su banda, Holger Schmieding, economista hefe di Berenberg, a afirma cu Alemania ta enfrenta problema ciclico den gran parti cu por disparce unabes cu e sector di produccion bay bek na un “crecemento significativo” den e di dos mita di e aña aki. E experto a confirma cu e pais tabata den recesion den 2023, pero, den su opinion “e indicadornan ta cuminsando na stabilisa.” “Nos ta den “rock bottom” den e economia Aleman,” el a conclui.
Durante medio december, e analistanan di Bloomberg ya a adverti cu e euro zone ta confronta e prome recesion desde e pandemia. E momento ey, ya a alerta cu e complicacionnan p’e euro zone lo crece debi n’e situacion na Alemania, e mayor economia di e region, cu ta enfrenta dificultad pa supera e problemanan den e sector produccion.
