Diaranson 2 di Mei, Corte den Prome Instancia a duna gobierno ordo pa dentro di dos siman mas tardi, nan sigui cu e blokeo di e tereno entre The Mill Resort y e ex ‘House of Cheng’. E caso aki a wordo trata dia 23 april.
Corte a dicta na fabor di gobierno di Aruba, unda cu nan a bisa cu gobierno por sigui blokea e tereno etre The Mill Resort y e ex House of Cheng. Pero cu e biaha aki e mester wordo haci cu entre otro bloki grandi, y no solamente cu baricada di DOW. Esaki ta loke hues, mr. van der Leur a dicta den su sentencia den e caso sumario di Aruba Birdlife Conservation (ABC) a cuminsa contra di gobierno. Tambe a hues ta prohibi gobierno pa otorga e tereno den erfpacht ya cu esaki lo ta violando e destinacion di e tereno cu ta bou di proteccion di e Ruimtelijke Ontwikkelings Plan (ROP), cu ta vigente desde mei 2009 pa un termino di 10 aña (dus te cu mei 2019). E partido demanda The Mill, no tin validez, ya cu e compania den su forma registra na Camara di Comercio ta failliet y como tal no ta existi mas.
E NGO, Aruba Birdlife Conservation (ABC) dicidi di hiba gobierno corte ora cu na comienso di maart na momento cu nan a mira cu trabounan a cuminsa wordo haci ariba e tereno en cuestion, pa un construccion. E compania menciona den e caso ta Elmford NV, cu lo mester tabata haciendo trabounan pa e hotel The Mill. Aki a bay over tambe pa demanda e hotel, segun e inscripcion cu tin di e compania na Camara di Comercio. Pero a resulta cu e compania manera inscribi, no ta existi mas desde juli 2000. Como tal e no por fungi como partido. Gobierno a argumenta cu e caso no ta necesario den e forma presenta, y cu ta sugeri pa trata e caso den un caso di profundidad, esta un bodem procedure.
Mas aleu, gobierno di nan banda a mustra caba cu nan no tin problema cu e peticion di blokia e area. Mas aun, nan a cuminsa haci esaki caba. Di su banda, mr. van de Leur, a bisa di tin pleno confiansa cu gobierno lo sa di respeta e peticion pa cual e no ta impone e multa sugeri di 250 mil florin pa dia of parti di dje cu gobierno no cumpli. Esaki ta contrario na pensamento di ABC. Esaki tambe ta motibo pa cual hues a duna ordo na gobierno pa continua cu e blokeo di e tereno y ta prohibi gobierno pa duna e tereno den erpacht.
Como tal, hues ta nenga e peticion di ABC contra di The Mill, puesto e compania demanda Elmford NV ya no ta existi mas. Tambe e peticion contra di Pais Aruba ta wordo nenga ya cu mr. van der Leur tin confiansa cu gobierno lo sa di respeta e peticion.
Vonnis KG ABC-Land AuA-Mill Resort 2.5.2018