Riba 14 di juni Aruba y resto dim undo a celebra e fecha riba cual ta recorda y gradici donantenan di sanger. E personanan aki cu ta responsabel pa hopi bida salba. Na Aruba tambe a recorda e fecha aki riba cual Bloedbank a haya bishita di Gobernador Alfonso Boekhoudt.
Sr. Werleman den nomber di Bloedbank a gradici tur e donantenan, specialmente esnan den e temporada di pandemia aki.
Na e momentonan aki, Bloedbank tin rond di 1400 donante (cu ta 1.4% di e poblacion), cual ta un cifra hopi abou di loke ta nan meta cu ta 3% di e poblacion. Esaki ta nifica cu lo mester di minimo 1500 donante nobo. Pa atrae mas donante, a crea un website riba cual e ciudadanonan por registra pa bira donante (www.arubabloedbank.aw) . Unabes subi eyriba por whattsapp of por yena e aplicacion. Un persona lo yama e persona y splica e proceso pa bira donante. Un donante mester duna sanger cada un aña y mey. Personanan cu no a haci esaki den pasado, probablemente nan nomber no ta aparece mas pero lo por registra di nobo.
Pa duna sanger, mester ta residente di Aruba y tin un ID. Ta yama e persona pa un intake, recoge informacion, y despues mester haci un control medico. Donantenan mester ta di 18 pa 65 aña.
Esnan di tipo O Negatief ta wordo hopi yama, pasobra ora di accident mayoria ta esaki ta uza. P’esey ta aprecia si tin hende O Negatief y no ta donante, pa inscribi. Pero Bloedbank en general mester di tur tipo di sanger. Duna sanger ta un ayudo grandi pa esnan cu mester di dje, pero e bon ta cu ta controla e donante un bes pa aña.
Werleman a haci un apelacion na e ciudadanonan di Aruba pa coopera y duna sanger na esnan cu mester di esaki.