CARACAS, Venezuela- Na Caracas, e capital, y den gran parti di Venezuela, habitantenan a bay drumi mei mei di un blackout grandi y ta diabierna ta habri ainda sin coriente.
E regimen hostil di presidente Nicolas Maduro, a suspende scolnan y actividadnan di sectornan publico y priva pa 24 ora, y ta culpa oposicion Venezolano di e fayo. Maduro a bisa cu e ta un “guera electrico anuncia y dirigi door di e imperialismo Mericano”.
Criticonan di e gobierno di Venezuela ta culpa e corupcion y e falta di inversion. Juan Guaido, presidente interino di e pais desde januari, a describi e blackout como un prueba mas di cu tempo ta cabando pa Maduro.
Pa 12 or y 50 di diabierna marduga, a purba pa prome biaha pa reestablece servicio electrico, cu a dura solamente 5 minuut y e ciudad a bolbe keda den scuridad total.
Na e capitulo aki por agrega declaracionnan di Jorge Rodriquez, cu a sigura cu e cuater estadonan di e region oriental ya caba a haya coriente, pero informenan a traves di e red social Twitter, a desmenti e noticia aki.
Pa esaki, via declaracionnan duna door di Delcy Rodriquez, e ta bisa cu door di e falta di servicio electrico, Nicolas Maduro a dicidi di cu diabierna no tabata tin scol ni tampoco trabao, ni publico ni priva”.
Na Caracas, e servicio di Metro, vital den e mobilisacion di pasaheronan door di e colapso di transporte publico, a suspende su actividadnan pa causa di e fayo, cual a obliga miles di persona pa cana trayectonan largo pa yega nan destino.
Servicionan di data y voz di e companianan telefonico cu ta opera na Venezuela tambe a wordo afecta.
E Corporacion Electrica Nacional (Corpoelec) di biaha a reacciona ariba e blackout y a señala via Twitter cu e instalacionnan di Guri a wordo sabotia y esaki ta e esun mas importante den e sistema.
Na Venezuela fayonan electrico ta frecuente, cu ta cay bou di control di estado a trabes di Corpoelec.