Blackhawks ta baha rabia riba e barberonan di Final Touch pa bay cu e promer partido den best out of 3

Campeonato HEINEKEN fast pitch di Aruba Softball Bond dedica na Minguel Tromp y Emelina “Mamai” Loopstok ta drentando su recta final. Den categoria A-Klas play off page system a inicia. Kiko ta page system? Page system ta un systema internacional cu ta wordo hunga pa hopi aña y tambe ta wordo aplica den tur campeonatonan internacional unda e ekiponan cu clasifica number 1 y number 2 lo ricibi un doble oportunidad. Number 1 y number 2 ta hunga un serie di best out of 3. Ganador ta sub campeon y ta bay drumi warda. Number 3 y number 4 ta hunga un best out of 3 unda e perdedor ta bisa ayo y ta bay cas mientras e ganador di e serie aki ta bolbe hunga un best out of 3 contra e perdedor di e prome serie esta di number 1 vs 2. E ganador di e serie aki lo hunga un serie di best out of 5 den e gran final contra e ekipo cu a gana e promer serie cu tabata wardando. Blackhawks clasificando na di 4 lugar diaranson anochi a bin por la goma cu un bateria fuerte conectando un avalancha di hit. E barberonan di Final Touch a purba di tur manera pa drenta den wega pero tur intent tabata envano. Na final Final Touch a laga sa cu diabierna nan lo topa bek den e di dos wega y aki otro gai lo canta. Blackhawks 11 careda, 16 hit, 0 eror. Final Touch 2 careda, 7 hit, 1 eror. Rodimar Geerman tabata solido riba monticulo cubriendo henter e ruta regalando solamente 2 base por bola y ta pone e victoria riba su nomber. Santiago Gratero di Final Touch ta resulta pitcher perdedor ricibiendo relevo di Melchor Abreu den di tercer entrada. Den combinacion nan ta regala 2 base por bola y un hit by pitch. Miho bateadornan pa Blackhawks ta resulta Rodimar Geerman aportando na su propio causa di 4-3, Mario Fingal di 4-3, Leonard Dirksen y Gregory Croes di 4-2, Brian Dake y Edgar Rafael tur di 3-2. Pa Final Touch ta luci na plato den causa perdi Milciades German 1-1, Josiel Jacob, Eugene De Cuba y Felix Dabanse di 2-1, Franci Perez, Francisco Gullon y Juan Sosa di 3-1. Diabierna awor playoff A-Klas ta continua den nan di 2 wega di e serie unda segun Blackhawks nan ta bin pa caba cos y continua pa e proximo serie mientras e barberonan di Final Touch kiermen cu e skernan ta skerpi mula pa empata e serie y pusha esaki pa un wega decisivo diadomingo na Kudawecha. Pueblo di Aruba ta keda invita cordialmente diabierna awor cuminsando pa 7:15pm na Kudawecha wega number 2 di playoff Piratas vs Celebrities y pa 9pm Blackhawks vs Final Touch.

Comments

comments