Recientemente Aruba a ricibi bishita di un grupo di agente di biahe procedente di Chile. E grupo cu ta consisti di 10 agente di viahe, 1 representante di Avianca y 1 representante di ATA Chile a bishita nos isla pa asina sera conoci cu e producto Aruba mas mihor. Durante un bishita asina aki, Aruba ta haya e oportunidad pa mustra e calidad di nos acomodacionnan, restaurantnan, y hospitalidad. Alabes, ta un momento prefecto pa fortalece e relacion cu compania aerolinea cu ta brinda vuelonan pa Aruba y otro partnernan.
Durante nan bishita cerca nos isla, representantenan a keda serca e acogida hotel RIU Hotel y a disfruta di diferente actividad cu Aruba tin pa ofrece. Asina aki nan a wordo invita pa experencia un “Exiting outdoor dining”, un paseo riba Catamaran, y un paseo rond nos isla. Durante nan delaster anochi riba nos isla, e representantenan a haya e oportunidad pa experencia e alta servicio cu White Modern Cuisine tin pa ofrece. Alabes, e grupo a ricibi diferente informacion tocante nos isla, incluyendo plan y proyectonan cu tin riba mesa.
E agentenan di biahe tabata impresiona cu e calidad cu nos isla tin pa ofrece. Specialmente cu e amabalidad di nos hendenan y tambe di e hecho cu nos ta un nacion cu ta domina varios lenguahe. Ademas, nan tabata hopi satisfecho cu e servicio cu nan a ricibi na e diferente establecimento riba nos isla, nos bunita playanan, restaurant y acommodacion di alta calidad y tambe e infrastructura di Aruba.
Chile su economia ta wordo clasifica como uno “high-income” y ta wordo concidera como un di e mas stabil y fuerte den Sur America. Esaki ta haci’e un mercando interesante pa Aruba mercadia aden y sigui crece. Actualmente Chile ta representa e di 5 mercando mas grandi den Sur America referiendo na bishitante pa Aruba. E aña anterior Aruba a ricibi 9,796 bishitante Chileno cu ta representa un creciemento di 13.4% compara cu aña 2014. Te cu oktober di e aña aki nos a ricibi bishita di 9,579 bishitante procedente di Chile cu ta un creciemento di 10.3% compara cu e mesun temporada den 2015.
Ta e esfuerso incansabel di e ekipo di Aruba Tourism Authority cu ta organisa biahenan manera esaki pa asina introduci agentenan di biahe na nos isla cu na nan turno ta partner clave pa yuda nos bende Aruba den e mercado. E bishita aki cu e agentenan di biahe ta conforme e maneho pa sigui inverti den crecemento di mercadonan manera esun di Chile cu tin potencial pa ta rendabel pa Aruba.