Riba diaranson 2 di December Gobernador di Aruba, Su Excelencia Alfonso Boekhoudt, a haci un bishita di trabou na e COVID-19 Testcenter na Aeropuerto Internacional Reina Beatrix.
Olga Rodriguez (Cluster Manager Asistencia Medico y Policlinica, HOH) y Jurgen Benschop (Director di Operacion, AAA) a ricibi Gobernador Boekhoudt. E meta di e bishita tabata pa Gobernador haya un impresion di e actividadnan na e testcenter di e aeropuerto y di e cooperacion entre AAA, DVG y HOH.
Den e cuadro aki, Jurgen Benschop, Michael van de Poel (Hefe di Team DVG) y Shahaira Geerman (Gerente di Cuido, HOH) a duna un presentacion tocante e trabounan diario na e testcenter di aeropuerto y e colaboracion entre e tres instancianan.
Despues di un recorido den aeropuerto, Gobernador a tira un bista na e testcenter den e sala di yegada. Seguidamente Gobernador Boekhoudt a papia den VIP room cu Joost Meijs (Director AAA), Jacob Vroegop (Presidente Hunta di Directiva HOH), Edwin Kelly (Director di Aviacion) y Jerry Staring (Director DVG).