Siman pasa, Edwin Bleichrodt, procurador general di Corte Supremo di Hulanda y Jolien Schukking, hues representante di Reino den Corte Europeo di Derecho Humano na Strasborg, a realisa un bishita di trabao n’e islanan di Caribe Hulandes. Durante nan bishita, nan a reuni cu varios autoridad local y a recore importante luga n’e islanan di Sint Maarten, Saba y Sint Eustatius.
Na Sint Maarten, Bleichrodt y Schrukking a bishita gobernador y e ombudsman, fuera di a haci un recorido n’e prizon di Point Blanche. Tambe nan a tene combersacion cu e huesnan di e sede di Sint Maarten, como tambe cu e fiscal general y e decano di e Orden di Abogado.
Na Saba y Sint Eustatius, nan a reuni cu e respectivo gobernadornan y hefenan di polis, nan a bishita e celnan di e diferente wardanan di polis y a recore e instalacionan nobo di corte na ambos isla. E bishita di trabao tabata combina cu recorido na museo y tour n’e islanan pa nan conoce miho nan cultura y contexto local.
Bleichrodt y Schukking, tabata compaña pa Sigmar Camelia, miembro di corte y ricibi pa nan coleganan di corte manera Joyse Daniel, Tara de Oliveira, Scarlet Lopez y Monique Brown. Ora nan bishita a finalisa, ambos funcionario a expresa nan satisfaccion cu e biahe y a anuncia cu nan siguiente stop lo ta n’e islanan ABC p’asina nan sigui cu nan agenda di trabao.