ATIA recientemente, representa pa nan presidente, Ronald van Trigt, ariba invitacion di Camara de Comercio di Pereira, a realisa un biaje sumamente fructifero pa Colombia.
ATIA y Camara di Comercio di Pereira a cera un convenio aña pasa, pa explora e posibilidad pa crea oportunidadnan nobo y innovativo entre Colombia y Aruba.
E invitacion pa sigui traha ariba e puntonan di e convenio, cu ta encera oportunidad di comercio pero tambe enseñanza, medio ambiente, turismo, deporte y salud, a ricibi oido di ATIA pero tambe di gobierno y parlamento.
Camara di Comercio di Pereira a invita representantenan di Parlamento di Aruba pa asisti na e viaje y ser informa di e posibilidadnan cu e acuerdo aki por representa pa Aruba. Alabes, di parti di gobierno di Aruba sosten a wordo duna na e convenio y viaje aki. Di parti di Parlamento e honorable miembronan: Sra. Setty Christiaans-Yarzagaray, Sr. Ricardo Croes y Sr. Robert Candelaria a asisti na e reunion di gremionan.
Durante e reunion hopi representantenan di gremionan di Risaralda y Pereira tawata presente. Ademas di representantenan di Camara di Comercio di Pereira tawata presente:
Sr. Gobernador di Risaralda Sigifredo Salazar, Secretaria Economico y Competividad di Gobernacion di Pereira, Sr. Juan Carlos Valencia – Diputado di Asamblea di Risaralda, Universidad Tecnologico de Pereira (Innovacion/Investigacion/Extension), Directora di Turismo di Gobernacion di Pereira, Cluster di Salud di Gobernacion di Pereira, SENA (Coordinador Academico/Grupo Formacion Profesional), ANATO Eje Cafetero, Director Ejecutivo di Cotelco, CRC (Comision Regional de Competividad), ANDI Risaralda (Director Regional), Pereira Convention Bureau (Directora di Turismo Corporativo), Invest in Pereira, UDL y Colombian Adventures.
Manera por deduci for di e gremionan presente, Camara di Commercio di Pereira a coordina un reunion cu representantenan sumamente importante pa asina duna contenido na e acuerdo y jega na puntonan di cooperacion specifico cu Aruba. Intencion ta pa jega den e proximo lunanan na un bishita oficial, lidera pa Gobernador di Risaralda, di e gremionan presente na e reunion importante aki.
ATIA ta sigui traha ariba tur aspecto pa crea oportunidadnan nobo pa comercio y Aruba en general, di cual e proyecto Risaralda/Pereira ta uno.
ATIA kier a gradici Colombian Adventures pa e gran trabou di coordina e biahe y bishita di e representantenan di Aruba. Gradicimiento ta bai tambe na Presidente di Staten Sr. Ady Thijsen pa su coordinacion y esfuerso pa cu e proyecto aki, na e Parlamentarionan cu a tuma tempo pa presencia e reunion aki y na Gobierno di Aruba pa nan sosten di purba duna e acuerdo aki pero tambe e acuerdo oficial entre gobierno di Colombia y Aruba contenido.