Recientemente Sr. Randall Croes a haci un bishita comercial pa Haiti. Como miembro di Directiva di Camara di Comercio y Industria Aruba (KvK) y danki na esfuerso di Camara di Comercio Benelux-Haiti (CdCBH) Sr. Croes a completa un bishita exitoso caminda cu e obhetivo Tabata ta pa haya un bon bista di e ultimo desaroyonan economico y di recuperacion di infrastructura di e pais bisiña den Caribe. Nos kier gradici Sunrise Airlines como sponsor principal pa e oportunidad aki.
Evento: HOW TO DO BUSINESS IN ARUBA
Camara di Comercio Benelux-Haiti a organisa e evento “How to do business with Aruba” caminda cu a invita un representante di KvK di Aruba pa forma parti na e delegacion pa ta presente na e evento aki na Haiti. Sr. Croes a participa na e evento cu un presentacion extenso encuanto haci negoshi cu Aruba caminda e la splica di tur e desaroyonan y diferente puntonan importante pa tene na cuenta na momento cu kier inicia actividadnan comercial cu Aruba. E evento tin tambe e fin di laga tur esnan invita conoce mas di cerca kico tur e desaroyonan economico di Haiti ta den e ultimo tempo y asina observa di cerca e progreso di Haiti despues di varios calamidad natural y kico tur nan tin di ofrece y con por yega na haci negoshi entre Haiti y Aruba. E evento a ser organisa dia 25 di Mei na hotel ‘El Rancho’ na Port Au Prince, na unda cu a Sr. Croes a haci un presentacion amplio di Historia y economia di Aruba, desde tempo di colonisacion te dia di awe (incluyendo hopi potret) na un audiencia di interesadonan pa exporta servicio y productonan pa Aruba. El a duna tur un impression visual e di datos importante di nos desaroyo economico.
A encontra cu diferente empresario di Haiti cu rtabata eynan presente den un sala yen yen, y a elabora riba nan producto y su potencial exportacion pa Aruba, di empresanan cu ta fabrica diferente alimento, souveniers, fruta, aquacultura, agroindustria, industria di kimico, compania di aerolinea y tambe di cargo.
Bishita na diferente empresa pa wak tur cos en persona
Camara di Comercio Benelux-Haiti a organisa un tour di un dia completo caminda a bishita diferente fabrica, negoshinan di artesania, carga, logistica y aerolinea.
Tambe a haci un tour den entre otro: un fabrica di habon industrial caminda ta produci habon di puiro; un fabrica di pasta; un fabrica di alimento; fabica di bebidanan di soda y juice tur esakinan funcionando cu maquinaria moderno di ultimo tecnologia. A bishita tambe fabrica di acesorio personal manera tas y cartera pa menciona algun.
A tuma tambe e oportunidad pa bishita un proyecto comunitario cu ta wordo describi como un incubador economico funda a base di donacionnan y demas colaboradornan social. E incubador aki ta manera un aldea di arte y cuminda cu ta forma door di varios negoshi chikito (micro-businesses) pa funciona den nan mercado. Sr. Croes a duna un session di sugerencia y tips con pa atende cu mercado turistico interesa den destinacionnan manera Haiti.
Siguientemente a bishita fabricanan di paña y acesorio pa consumidor y pa uniform comercial. Mester menciona cu e fabricanan aki tin beneficio den nan exportacion pa Merca como cu nan no ta paga impuesto di importacion na Merca. For di Merca nan ta wordo bendi rond mundo. A reuni cu ehecutivonan di e aerolinea na su localidad.
Fashion & Art show pa mision KvK presente na Consulado General di Belgica:
E atardi di dia 26 di Mei, Camara di Comercio Benelux-Haiti a organiza un Fashion Show, “Haiti De Tête Au Pied” of “Haiti di Cabez te cu Pia” organisa na e residencia di e Consul General di Belgica na Haiti.
Na e exhibicion por a presencia diferente producto di confiteria, escultura, moda, cos dushi, manera cocada, fruta preserva entre otro. Tambe por a wak artesania y diferente tipo di obra di arte. Esaki a bay acompaña cu un desfile di moda y pa e bon ambiente cu pisca hasa di hopi bon calidad di Aquacultura di Haiti y musica.
Sr. Croes ta indica cu e a bolbe cu hopi informacion y material di tur e empresanan aki di Haiti. E material aki lo ser poni disponible via di website di Camara di Comercio www.arubachamber.com, den proximo simanan. Den un Conferencia di Prensa varios di e material cu ta inclui video y fotografia a wordo presenta cu informacion di tur empresa bishita.
Mision di e bishita di trabou
E mision principal tabata pa Sr. Croes colecta informacion y duna Camara di Comercio y e empresarionan di Aruba, un bista cla di e opcionnan di negoshi cu Haiti ta ofrece, y principalmente observa cu Haiti a recupera di tur e calamidadnan natural cu e la wordo confronta cune y ta un pais cu mas experiencia awo y cu un bon mercado di export pa Merca cu fuerte incentivo fiscal pa largo tempo.
Tambe Camara di Comercio a informa empresarionan di Haiti di e tamaño, reglanan di negoshi, desaroyo y potencial di Aruba como mercado.
Idioma Ingles ta ampliamente papia entre empresarionan
Pa loke ta trata e esfera di negoshi, aunke Haiti ta un pais caminda e idioma Frances ta domina, sr. Croes a bay bon prepara pa usa idioma Frances den henter e mision y su presentacion. Pero tur cos por a bay na Ingles pasobra cu casi tur e comerciantenan cu sr. Croes a cera conoci cun’e ta papia y compronde Ingles tambe. Hopi di nan a caba un estudio na Merca y por comunica bon den Ingles.
Haiti ta un pais di 14 miyon habitante, e tin un infrastructura extenso cu ta consisti di industrianan y tambe hopi servicio cu e oportunidad pa exportacion. KvK ta sigui mantene lasonan cu nos bisiñanan den Caribe via colaboracion cu e otro Camaranan di Comercio di e region pa asina sigui desaroya nos industria y pilarnan economico.