Siman pasa departamento Arubiana di Biblioteca Nacional Aruba a haya bishita di sr. Greg Peterson cu a bin entrega un ehemplar di e buki Bird Wildlife of Aruba pa añadi den e Coleccion Nacional di Aruba.
Sr. Peterson a wordo compaña pa sr. Ron Smit di LM Publishers y sra. Alice van Romondt di Fundacion Editorial Charuba. Sra. Des Croes, bibliotecaria kende ta maneha e departamento Arubiana, a ricibi e preciosidad di publicacion aki. Un publicacion asina valioso cu tin potret y nomber di 254 tipo di parha cu tin na Aruba. E potretnan ta di Greg Peterson y su ruman Albert Peterson. Texto den e buki ta di Greg y Annette Peterson-Bredie.
Departamento Arubiana ta gradici autornan y otro personanan responsabel pa publicacion di Aruba of tocante Aruba pa percura pa un ehemplar di nan publicacion ta den e Coleccion Nacional di Aruba.