Fundacion Artistar bou auspicio di Unoca tin e gran honor di dedica e Festival aki na tres baluarte cu durante hopi añaa contribui pa engrandece nos Cultura Musical den diferente genero. Cu su 15 aña Sr. Jacinto C. Croes conoci como Chinto Croes, e trompetista, a start cu les di musica cerca Frere Fredericus. Cu e edad hoben ey te cu su 18 aña e tabata integrante den e banda ‘Estrella Musical’. Despues den ‘Impacto Musical’ como trompetista pa 3 aña. Chinto tambe a lanta su mesun Banda ‘Combo A’ ( Combo Aruba) y a sa di mantene pa 6 aña tocando Bach Trombone, e tabata director musical, areglista, cargado di instrument y organisado di Fiestanan bailable. Despues el a integra den ‘La Inspiracion’ y ‘Los Juveniles’, bandanan hopi popular di Aruba. Chinto a participa tambe como cantante den Tumba Festival y a compone pa Henry Kock, Mario Steenen y hobennan cu a bay cu Corona di Reynan Infantil manera, E Pato, E Trein, ‘Kokoyoco ta mi te guy’ canta pa Rupi Rupi Croes y Derrick Dubero tambe a conkista e corona! Como areglista Chinto a yuda pa e Road March King Tito Flores ( di feliz memoria) cu e cancion ganador KING KONG! Asina Chinto Croes a sigui aregla y compone pa varios artista local cu temanan tipico, cancionnan Mexicano y otro genero. Tambe pa Dia di Sta Cruz, Himno di Ekipo di Estrella, areglista principal den e produccion di Chaly Croes “Mi guitara y serenata” cu e ‘Duo Oro’ Berta y Ailene! Ela aporta na hopi Festival di Dande. Ela compone hopi tema pa Festivalnan di Himno y Bandera, den tur Chinto su composicionnan y areglo a sa di cay den premionan ! Boso ta corda e famoso tema “Sopi Yuwana”? Chinto a graba na Venezuela cu Casa Disquera Fideles cu Los Juveniles, den temporada di fin di aña, tur tempo di Folklor y tambe cancion pa Betico Croes (dfm). Mariachinan cu ela participa tabata; Mil Amores, Mariachi Guadarincana, Copa de Plata, Aruba y Mariachi Estrella. Akinan ela participa den workshop na Mexico y a toca tambe Cu Mariachi Perla di Aruba den e encuentro cu miho Mariachinan di Mundo! Chinto a participa tambe den Show di Ana Gabriel na Aruba. Naturalmente Curaçao, Boneiro y Hulanda no a perde Chinto su presentacion como trompetista. Chinto su hobby tabata futbol cual e tabata hunga pa Union Sta Cruz, Vitesse y Centro Deportivo Ayo. Ela funda S.V. Sporting y tabata miembro di A.V.B. Chinto Croes a combina Deporte y Musica cu a resulta fantastico pa su trayectoria musical. Jacinto C. Croes 58 aña a duna su tempo valioso pa mantene nos Cultura y Amor pa Musica y deporte! E lo ricibi su merecido Homenahe den e Tercer Festival di Musica Mexicano Organisa pa ARTISTAR (Artistanan cu Amor pa Musica y Arte) y UNOCA unda 4 Categoria lo tembla ‘China Club’ riba diasabra 31 Augustus pa 7’or di anochi.