Diaranson atardi na Stichting Ambiente Feliz cu ta situa na Santa Cruz e personalnan a keda sorprendi cu un bunita gesto unda Bingo Aruba a haci un donacion di 20 mil florin na e instancia cu ta cuida e personanan grandi cu limitacion.
Na Stichting Ambiente Feliz na Santa Cruz ta cuida 18 persona di edad cu por cana pero cu limitacion. E director sra Althea Williams Schmidt duna e conferencia a bisa cu e ta contento cu e donacion cu nan ta haya y principalmente di Bingo Aruba debi cu nan ta cuida e personanan handicap 24/7.
Irma Dirks cu ta un personal di e Ambiente Feliz a menciona cu e tin 35 aña laborando y e ta gusta su trabou y su funcion. E ta gradici bingo Aruba pa cu e donacion haci debi cu ta algo cu nan tin mester pa por sigui brinda asistencia na e clientenan y haci diferente actividad.
Schwengle como un groep begeleidster tambe durante e conferencia a bisa cu ta contento cu e donacion haci cerca di nan y otro empresanan cu kier haci donacion ta mas cu bon bini debi cu esaki ta yudanan cubri gastonan cu ta ser haci pa e clientenan cu nan ta cuida. Ambiente felis ta traha cu hendenan special, na Santa Cruz ta cuida 18 persona di edad y na San Nicolas tin 5 hoben. Ta pasa dia cu e clientenan, duna cuminda, haci diferente actividad y dunanan e atencion cu nan tin mester.
Ofo tambe tabata presente y a menciona ta un honor pa ta presente na momento di e entrega di e donacion y momento cu a drenta a compronde cu Ambiente Feliz ta un luga cu tin mester di donacion aki. Y ta pidi comercio cu tambe kier aporta por haci nan donacion na Stichting Ambiente Feliz. Ofo ta contento di ta forma parti di Bingo Aruba y e bunita donacion di 20 mil florin cu ta keda haci.
Na final e representante di Bingo Aruba sra Maydeline Solognier a haci entrega di e donacion unda cu e directora di e fundacion a firma e documentonan oficial.